Pyrchah ka NITCRM wow thung MDC da ki bru ri-loom baar jylla

Shillong: Ka sorkar jylla da thung ko da ka Sub Committee neibynta wow pait bniah biang ya i e yumut wow pynkylla ya ka Sixth Scheduled ya kawa da dep wow rah yaklam leh ha Rajya Sabha ha u Thohlakhmi (Feb) uni u snem wei kawa em katni ka yung bichaar ka Select Committee wa da thung da ka Parliament.

Ka sorkar jylla da thung ko ya kani ka Sub Committee hadien wa yachem wa ki dkhot ka Meghalaya Indigenous Tribal Constitutional Rights Movement (MITCRM) ynne ka sngi, kawa kynthup ya ki seiñbhalang waphær waphær ka jylla, kamjooh leh ya ka Synjuk ki waheh chnong.

Hawa klam hadien i yachem wa u montri kaam pohyung ka jylla, u James K Sangma da ong wa ka sorkar da booh por wa kani ka Committee wow pyndep u bichaar ya ka Draft Amendment hapoh 30 sngi, wei ya kani ka Committee daw khlieh da u montri wa pait ya ka District Council Affairs (DCA) wa ki dkhot wa kynthup ya ar ngut ki montri ka sorkar, u Hamletson Dohling wa u Metbah Lyngdoh, u Advocate General, u Commissioner Secretary ka DCA kam u Member Secretary wow mihkhmat na ka sorkar jylla. Ha kani ka Committee daw em leh ki dkhot neiliang ka MITCRM wa ki CEM yong waroh le tylli ki Autonomous District Council (ADC).

“Katkam ka dorkhat wa da phah da ka MITCRM da pynsñiaw wa emkaam wow pait bniah biang ya katai ka e yumut hajrong ki kyndon ka Sixth Schedule, yow lai lang ko katkam wa da e yumut ka National Commission on Scheduled Tribe (NCST) neibynta i yoh myntoi ki bru ri-loom, nalor wow pait bniah leh ya i pynkylla yong ka Scheduled Tribe List katkam ka President of India Order, 1950 neibynta ka jylla, wei i pynkylla ya ka Article 388 wa 338 (a) yong ka riti synchaar,” da pyntip u James.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Hawa yaklam wa uwa e ktien ka MITCRM, u Smuel B Jyrwa da ong u wa dang boon ki duna wei dang emkaam wow yaklam biang khamtam ha KHADC wa JHADC wei da e yumut ki wa toh u em 31 ngut ki MDC wa kynthup ya 2 ngut ki wow man kam ki MDC wow thung (Nominated).

Da ong u wa i pyrchah yong ka MITCRM wow pynboon ya i em ki MDC toh wym e laad ya kiwi ki bru ri-loom na kiwi ki jaitbru na baar jylla wow man kam ki MDC ha ki ADC ha kani ka jylla, neidaw wa ini man ko i ma wa khroo ya ki jaitbru wa khian paaid kani ka jylla.

Neiliang u dkhot ka MITCRM, u RL Blah da ong u wa khyrngiat wow yoo yaka Draft Amendment neidaw wa ym myntoi ko wow wanrah ya ki Scheme næ ki kaam pynroi ha kani ka jylla yong i lada ym yoh ka yada kam ki khian paaid.