Daw bichaar chwa ka sorkar yaka aiñ thymme wa yatoh wa i daiñ kuna ya kiwa yah kari pyrchah yaka aiñ

Shillong: U montri ka jylla wa pait ya ka chnat Transport, u Sniawbhalang Dhar da ong u waka chnat daw bichaar ko heiyatoh waka aiñ yah kari kawa dang pynmih thymme wa ki kyndon ha kane ka aiñ hadien wa ka sorkar pyrdi da wanrah ko ya i pynkylla ha ka Motor Vehicles Act, 1988.

Kam wow pynkynmoo wa ka dorbar Parliament da mynjur ko ha ka 15 tarik u Iaiong (April) uni u snem yaka Motor Vehicles (Amendment) Bill, 2019 da i thmu wow pynkhlan chooh chooh ya i pynchitom ya kiwa yah kari kiwa tyngkheiñ aiñ deiwa booh leh ka kuna kawa heh ya kiwa leh pyrchah, wei kani ka aiñ wa thymme u pynkrehkaam nadoh chi tarik uni u bnai.

“Hadooh katni ym pu yoh ya i phah cha ka yung krehkaam na ka sorkar pyrdi wei manda yoh daw chim yaka rai la daw pynkrehkaam ne ym pynkrehkaam ya katai ka aiñ,” da ong u montri hawa klam ynne ka sngi.

U Sniawbhalang da ong u wa ka sorkar daw bichaar bniah leh lada kani ka aiñ u myntoi ko næ ym em ya ki paidbah.

Related posts

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

“Lada man ko kawa myntoi ya ki paidbah, ka sorkar u pynkrehkaam ko, tangwa lada ym e myntoi ko ye wow hap bichaar chwa,” da ong u.

Katkam wa ong u montri, ka chnat ka da pynman ko yaka e sikai wa man ki por wow pyntikna wa chngaiñ ha ki sarok kari wow sikai leh ya kiwa yah yow tip ki yaka aiñ wa ki kyndon.

Kam wow pnytop wa ka jylla Madhya Pradesh, West Bengal da kyntait ki wow pynkrehkaam ya kani ka aiñ deiwa pynsñiaw wa ka daiñ kuna da man ko chawa palat pood, wot neiliang u Transport Minister ka Rajasthan da ong u wa ka sorkar ha Rajasthan leh daw pait ko wow pynkrehkaam hadien wa da bichaar bha ya ka kuna katkam katai ka aiñ.