Jowai : Ka yakop yaleh Football ka Chilliangraij Sports & Youth Affairs kawa tip kam ka 5th Tiger Five Football Tournament da sdang ya ka ynne ka 7 tarik ha madan ka Chilliangraij heiwa da wan wai ya ka da u ma Chaphrang Passah u President ka Jaiñtia Journalist Association.
U ma Chaphrang da kyntu u ya kiwa yalehke u em ki i mynsien maya ya ka Football khlem pyrkhat wa u yaleh katkam i rukom su ya ki. Da e nongmuna u ya ka Leicester City wa dang dep jop ya ka Premiere League heiwa ki player yong ka toh kiwa duna bha i su ya ki la nujor wa kiwi ki dhab. Tangwa dei yalehke hok ki deiwa thrang yei naam jop hanlada hei yathong da booh wa emlad ki du 1 naka 5000 u jop ki tangwa da ye ki u rah yei naam wa jop.
Ha ka yakhun wa nyngkong kani ka Tiger Five da yachem ka Khliehtyrchi SC pyrchah ya ka Tyllilang SC.
Ka Khliehtyrchi sdang wot ka yalehke thap wot ko ya ka kool wa nyngkong ha ka minit wa nyngkong kawa thap da u Poibiang Pohchna wei da pynbood sa artylli ki kool na u Emboldon ha ka minit wa 12 wa 15. Ha chwa u kut ka kylla step ka Tyllilang SC da yoh ko u su chi kool ha ka minit wa 28 na u Pdiang Ryngkhlem.
Ha ka kyllamiet ka Tyllilang da su ko sa ar tylli ki kool kiwa da thap da u Hamlangki Rymbai ha ka minit wa 45 wa 52 tangwa ka Khliehtyrchi da ye ko pyntam sa kawi ka kool hachwa u kut ka yalehke ha ka minti wa 59.
Kamtæ ka Khliehtyrchi da jop ka da 4-3.
Kani ka Tiger 5 toh kawa yaleh mar 5 ngut chilliang wei mar 30 minit chi kylla.
Ka yalehke ha ka sngi nyngkong ka 9 tarik u Naisan daw man ko heipor 3:30 janmiet ha pyrdi Ka Super Galaxy pyrchah yaka K.C. Combine.
Discussion about this post