Jowai: Ka Society for Environment Protection and Sustainable Development hadien wa da bichaar bniah ya i jæd wa i man ka rymaw khamtam ya i khloh moochuni da ki karkhana pymnih khyndaw-bilat hapoh ka jylla khlem da bood yaki kyndon yong ka Forest Conservation Act 1980, da ujor ko cha u Secretary ka Ministry of Environment Forest and Climate Change yong ka sorkar pyrdi wow tuklar lang hajrong ini chah tympra ka rymaw wei ha i jooh i por da pynsñiaw leh ya i pyrchah ya kiwon kiwon ki bru samen næ ki Company wow seiñ karkhana chooh chooh neini chakhmat khamtam ki karkhana pynmih khyndaw-bilat neibah kamwa tip du ha Jaiñtia Hills da em hadooh 10 tylli ki karkhana pynmih khyndaw-bilat wei hei yong sakhiat du 3 tylli ki karkhana khyndaw-bilat leh da dap wow pyndap khyndaw-bilat ya ka thaaiñ mihsngi waroh kawi.
Haka kyrwoh khubor wa da phah da u President ka Society u Wanbun Dkhar da ong wa ka yurim wa ka Society e dorkhat ko cha ka sorkar pyrdi toh wa hadien wa da bichaar yei long i man yong ka rymaw wei leh kam kiwa chong chnong ka ri India i em i ka hok (Fundamental Right) wow pynbha næ pynneh pyndap yaka rymaw da kiwon kiwon ki laad ki luti katkam wa da kdaw haka Article 21,48 wa 51A(g) yong ka Constitution yong ka ri wei chooh chooh u Dkhar da ong u wa ha katai ka dorkhat da pynsñiaw leh ya i sñiawsih hajrong i tyngkheiñ aiñ ki karkhana pynmih khyndaw-bilat khamtam hawa yatoh wa i rukom tih moochuni wa i ieh beiñ yaka rymmaw khlem daw pynbha yaki thaw kiwa chah ktah na i khloh moochuni neidaw wa ka sorkar jylla ym em da ye ko u pynchitom ya ki karkhana kiwa ym bood yaka aiñ.
Discussion about this post