Jowai: Ynne i sngi ki pulit ka Anti Infiltration Cell yong ka West Jaiñtia Hills District da pynman ki yei sylli ya ki kot ki sla yong ki baar jylla wa khih mylla ha iwi i yung harood u Sarokbah ha Soomer, West Jaiñtia Hills.
Ya ini i lai sylli da leh katkam ki kyndon ka Meghalaya Residents Safety and Security Act 2016.
Ha ini i sylli da pait ya ki kot ki sla yong ki baar jylla kiwa khih mylla kam ki mistri ha ini i yung (Proposed Hospital).
Neiliang u R. Rathore uwa man kam u Manager ki wakreh ha kani ka thaw da ong u wa boon hi kiwa kreh toh kiwa na Assam wa na Meghalaya.
Da em palat 30 ngut ki baar jylla wakreh ha kani ka thaw wei waroh toh kiwa biang ki kot ki sla lait noh ya ar ngut kiwa dang hapoh 18 snem i rta kiwa da pynsakhiat yei man tre ki da ki kot pynsabut sngikha (Birth Certificate) wa ki Card na Bank.
Ya kini ki ar ngut da phah noh ya ki wow liwan ki cha jar jiar ki chnong yong ki.
Kam wow pynkynmoo heini ka sorkar jylla da pynkhor bha ko wow kynreh ya ki kot ki sla ki baar jylla khamtam hadien wa pynbna ya ka thup wa pura ka NRC da ka jylla Assam heiwa da chah kyntait tre ri palat 19 lak ngut.
Discussion about this post