Khliehriat: Ka Dong Mainroad RBBJ FC da rah biang ko ar sien lynter ya ka Umlyngsha Inter Dong Football League 2019 næ ka UIDFT Trophy 2019 kawa pynlai da Ka Umlyngsha Youth Society & Sports Club (UYSSC) EJHD ha kani ka Sngi Chohthat kawa man kam ka Final yong ka Inter Dong hapyrdi ka Dong Mainroad RBBJ FC pyrchah ya ka Dong East Colony FC ha Madan Lumthangiong, Umlyngsha.
Ha ka yalehke hapyrdi kini ki ar dong da man ko kawa yakhaaid wei yoosuk bha neibhah ka yalehke da kut ko khlem em wa pynkhih jaar ha ka kylla step ha chwa poi cha ka ya dih umsoh.
Ha ka kylla miet won kini ar dong da yakhun pyrchah ki wow pyrchang u pynkhih ya ka jaar khamtam neiliang ka Dong East kawa pyrchang man i por hadooh wa yoh ko u thap chi kool ha ka minit wa 48 lyngba u Batskhem Amkhloo wei hadien ini ka yalehke da sdang ko chongchit mar ya chah thap kool ka Dong Mainroad FC kawa sdang u pynjoor i yakhun pyrchah wow su kylliang ya ka kool wa chah thap ko.
Kamtæ ha ka minit chwa u poi chawa jan kut ka Dong Mainroad FC da yoh ko wow ban kylliang ya ka kool lyngba u Hameroi Shylla wei khadooh da kut ka yaleh 1-1.
Kamtæ yow rai ya ka Dong wa jop ha kani Final da pynman da ka yachut Tie-Breaker heiwa ka Dong Mainroad RBBJ FC da jop ko da 4-2.
Ha kani ka sngi da wan saam ya ki Prize wa Trophy cha waroh ar Dong da u Waheh Chnong, u M. Syrti wa u B.Suchiang u waheh yong ka chnong.
Discussion about this post