Jowai: Uwi u khynroo wa yalehke Kickboxing uwa da pawnaam na ka ri-loom Jaiñtia ha kani ka kynti da chah jied biang u ha ka World Association of Kickboxing Organization-India (WAKO-I) wow mihkhmat ya ka ri India ha ka lympung WAKO World Cup Diamond Kickboxing 2019.
Uni u khynroo toh u Hameshaniah Suiam na Shangpung, West Jaiñtia Hills wei u lai yakhun u ha kani ka lympung ka wow man nadooh ka 24-29 uni u bnai ha Anapa, Russia wa pynlai da ka WAKO kawa man ka dkhot yong ka International World Games Association (IWGA) chirup wa ka World Anti Doping Agency (WADA), ka Peace & Sports, FISU & International Fair Play Organization wa pynman da ka International Olympic Committee (IOC).
Katkam wa man hi u Hameshaniah da chah jied biang u ha ka WAKO-I wow mihkhmat ya ka ri hadien wa da sylli bniah bha ya ki yakhun wa da yaleh u ha ki lympung wa dadep.
Man i iwa sñiawsih wot hadien wa chah jied uni u khynroo wow mihkhmat ya ka ri, ka jylla wa ka jaitbru, kat ya ka bai chimbynta wei ka bai sah u ha kani ka lympung haap bahkhlieh uni u khynroo na kata.
Hanla kattæ leh uni u khynroo khlem dooh mynsien da yaleh u samen wow pyndap pynbiang nadooh i lai i wan wot hadooh wow chim bynta ha kani ka lympung khlem yoh yarap na ka sorkar næ ka Jaiñtia Hills Autonomous District Council tangwa dei thooh yarap na ka yung wa kiwa maya yong oo.
Neiliang u Wyrta kitbot Kitrwiang i ya uni u khynroo wow ye hiwot u wow wanrah burom wot yei naam i burom ka jaitbru.
Discussion about this post