Jowai: Ka Waikhyrwi Sports Club and Social Organisation, Dkhiah West ynne ka sngi da wai pyrda ko yaka 13th Prize Money Knock-Out Football Tournament 2019 ha Teilang Playground, Dkhiah West.
Ya kani ka sngi sdang da man ko kawa phooh wa phieñ kawa da wan sakhi da ki spah ngut ki paidbah wa paitke, wa kynthup ya u waheh chnong yong ka Dkhiah West uwa da e burom ya u kongsan yei pylliat por u wow wan wai ya kani ka Tournament ha kani ka snem u Phasmon Dkhar, uwa man kam u EM ka JHADC.
U kongsan hei klam yong oo ha kani ka sngi da yaroh u ya kiwa pyllai ya kani ka Tournament kawa da ye u pyllai bait pyllai ryntih hadooh wa da poi ko chadooh kani ka kynti kawa 13, da pynsñiaw u leh yei kmen wow yoh u wai pyrda ya kani ka Tournament neibhah wa kani ka Tournament man ko kawa heh hapoh EJH District, heijooh i por leh man ko kawa paw hapoh Meghalaya hi waroh kawi, da e mynsien, wei pynchlur u leh ya ka Waikhyrwi Sports Club wow nang lai ko chaphrang wow nang pynman ko ya kani ka Tournament na uwi u snem cha uwi u snem khnang wa ki khon khynroo kiwa em sap wow yoh laad ki wow pynyoo ya ka sap wa da em ki, deiwa pynrap leh wa smat u wow yarap yaka Waikhyrwi Sports Club lada kam ka Club emkaam ko yei yarap yong oo.
Ha kani ka sngi ka da sdang daka yalehke hapyrdi ka Bataw All in One pyrchah yaka Khliehriat YWSC heiwa ka Bataw da jop ko da 4-0.
Kiwa rah yei naam jop ha ka Final kani ka Tournament u yoh ki T. 2 lak katwa kiwa yoh wa ar u yoh ki T. 1 lak. Waroh kiwa chimbynta da em ki 32 tylli ki dhab (Team).
Discussion about this post