Pyrchah ka KHADC wow pynku MDC cha 40 ngut

Shillong: Ka yalang yong waroh ki MDC ha ka KHADC wa kynthup ki MDC na i liang pyrchah wa liang synchaar, da rai ki wow e yumut cha ka sorkar wow pynku ya i em ki MDC du cha ka 31 ngut ym toh hadooh 40 ngut kamwa da tyrwa. Da rai ki wa 29 ngut toh u jied daka Election katwa ya 2 ngut wow thung dei thung wa kynthup ya uwi u chynrang wa kawi ka kynthai.

Ya kani ka rai da chim haka yalang ki MDC hadien wa da chong ya pyrkhat bniah wa da khlieh da u CEM u Teinwel Dkhar kawa pynman ha KHADC.

Hawa klam wa ki laad pathai khubor, u Teinwel da ong u wa i kyntait ka Council wow pynku ya i boon ki MDC chadooh 40 ngut, toh neidaw wa tieñ ya i ma kawa ye u mih ha i liang ka poisa ka tyngka.

Heijooh i por, u Chairman ka KHADC u Pynshngain N Syiem hawa pynrap hajrong kani, da ong u wa kamwa da yoo ya kiwi ki District Council da chem ki chiboon i eh ha ka liang ka poisa poilaiñ wow su ya ka tulop ya ki MDC wa ya ki wakreh wei lada pynboon ya ki MDC ye ko u wanrah i eh ya ka Council wei yow lait na ini i eh, ym kwah ki wow pynboon ya ki MDC.

Related posts

Hapoh dorbar ym lait ki tang u ang tangwa cha lait pynheh ki kam ki rem dorbar pynksan cha baar, ong u Titos ya ka EC ka VPP

June 26, 2025

Wanrah i ka mang tangka kawa boon dei yoh yei lut | Da pyndam leh ya ki Committee wa pynlut phut: VPP

June 24, 2025

Kamjooh u CEM da ong u wa ka yalang ka da pyrchah ko leh ya i ktien “Unrepresented Tribes” næ wow thung ya kiwi ki jaitbru ha ka Autonomous Territorial Council wei da e yaka rai wow e yumut wow pyndooh ya kani.

Hajrong i yoh laad kiwi wow yachim bynta ha ka Election, u CEM deilang wa u Pynshngain, u Paul Lyngdoh da ong ki wa ka Council da lai ko katkam ka Rule 128 ka AD Rule kawa da dep wow pynkylla ha i por wa man CEM u HS Shylla wow khang laad ya kiwi wow ya chim bynta ha ka Election tangwa ya kani ka pynkylla, dang sahteiñ ko ha ka miej ka sorkar wa u Lat ka jylla.