Shillong: U montri rangbah ka jylla, u Conrad K. Sangma ynne da chimbynta u ha ka yalang, Smart Village Movement wa pynman da ka University of Berkeley ha California, USA. Ka jylla Meghalaya leh da angnood ko wow sdang ya ka Smart Village heiwa daw jied 100 tylli ki chnong wow pynkrehkaam ya kani ka Project.
Ka Smart Village toh ka wow pynembor ya ka imlang sahlang ha ka chnong deiwa pynemkaam ya ka Digital Technology wa ka Open Innovation Platforms wow yoh u yoo ya ka yaaw ha kylleiñ ka pyrthai. Kani ka Smart Village toh kawa da pynwandur da u Professor Solomon Darwin.
U Professor Solomon Darwin da e u yei batai (Presentation) heiwa da pynyoo ya i buit yong ka Smart Village wei da pynyoo leh ya ki nongmuna yong ki chnong kiwa da pynkrehkaam ya ka.
Da ong u wa lyngba ini da ye u wanrah yei roi i paar ha ka imlang sahlang ka chnong lyngba i rukom pynlai yaaw (Business Model), wow wanrah yei roi iwa neh wa ki rukom khih kiwa ye u kreh ha kini ki chnong ki wow myntoi ya ki liang wanang.
U Professor Darwin chirup wa ki kattu katni ki khynnah puræ da wan ki cha jylla ha u Naiynru heiwa kini ki khynnah puræ da chimkhia ki wow thooh buit heiyatoh wa i eh i khoo wa yachem ka jylla.
U Conrad da chimkhia bha u ya ki kaam wa yatoh wa i chait i khiah, ka um, kam wow pynku ya ka kaam uiñke suwari ha ka jylla wow yaryngkat ko wa kiwi wa em ha pyrthai.
I yakrehlang wa kani ka University da booh toh neibynta san snem heiwa u Professor Darwin chirup wa ka Smart Village Team daw yaleh ki wow pynkylla ya ki chnong kam ki Smart Village.
Discussion about this post