Pynkhreh ka sorkar wow yakhun pyrchah ya ka ujor ka Harijan Panchayat Committee ha Supreme Court

Shillong: Ka sorkar jylla da pynkhreh ko wow yakhun pyrchah ha Supreme Court ya i ujor ka Harijan Panchayat Committee (HPC). Ya ini da pyntip da u Chairman ka High Level Committee (HLC) uwa man leh u symbood montri rangbah, u Prestone Tynsong hadien wa wai ka yalang yong katai ka Committee wa da thung kyrpang wow bichaar neibynta wow kyrriah ya ki bru wa sah ha Them Ïewmawlong.

Kani da man ko ka sien kawa phra wa ka HLC da chong ko neibynta wow pynbait ya kani ka kaam, tangwa hadooh katni ka Committee ym pu ye ko wow pynbait ya kani ka kaam neidaw wa ujor yong ki bru na Them Metor ha High Court ka Meghalaya.

“Ka sorkar daw phah ko ya ka dorkhat yakhun pyrchah ya ka ujor ka HPC cha ka Supreme Court hapoh 10 næ 12 sngi,” da ong u Prestone.

Kam wow pynkynmoo wa ka Harijan Panchayat Committee da ujor ko pyrchah ya ka sorkar jylla hajrong i kwah yoh yu kheiñ yei em kiwa chong chnong ha Them Metor, kamjooh ya ka hukum ka Meghalaya High Court kawa da rai da pynksan ko ya ka sorkar jylla hajrong katai ka kaam wei da phah leh ya ka HPC wow ya krehlang wa ka sorkar jylla yow pynbiang ya ki kot ki sla cha ka Shillong Municipal Board (SMB).

Related posts

Pynkhreh ka BJP Meghalaya ya ka Election 2028 deiwa pynskem ya kiwa kitkaam thymme

June 14, 2025

Kyntait ka Agatha Sangma wow man ka kyrtong MP cha Rajya Sabha

May 29, 2025

Hawa kylli, u Tynsong da kyntait u wow pyntip yaka yaklam ha ka yalang ka HLC, tangwa da ong u wa ka sorkar u leh ko ya kani ka kaam ha itæ i rukom yow ye u pynbait syndon chi junom, “I da thung dkhot i leh ya u Advocate General wa ya u Commissioner Secretary ka chnat aiñ ha ka HLC khnang wow ye u leh wow yakhun katkam ka aiñ,” ong u Tynsong.

U Chairman ka HLC da pyntip u leh wa ki bru wa sah ha Them Metor ym em wanrah ki ya ki kot ki sla wa da paan da ka chnat Municipal, kawa da kut noh i por ha ka 30 tarik u Naikhynde (Aug) uni u snem.