Jowai: Kam chibynta lang waka pyrthai waroh kawi, ka Jaiñtia Hills District Unit ka Meghalaya Veterinary Services Association (MVSA-JHDU) da chimbynta lang ko haka World Rabies Day 2019 da ka yalang wa pynman ha Community Hall, Lad Mukhla, West Jaintia Hills District, haka 28 tarik uni u bnai hajrong ka phang “Vaccinate to Eliminate”.
Kani ka sngi da sdang ko da i e Inject Anti-Rabies Vaccination wa mynkna ha ki le tylli ki chnong wa kynthup yaka Mukhla Mission, Mukhla Shohshrieh wa Lad Mukhla. Da phah leh ya ki Doctor wow lai ki cha kini ki chnong deilang wa ki Veterinary Assistant. Waroh 60 tylli ki ksaw da chah e Inject ki ha kani ka sngi.
Yaka yalang da pynlai da u Dr. C.D. Sangma, District A.H. & Veterinary Officer, West Jaiñtia Hills District, Jowai, uwa da pdiang burom leh ya waroh kamjooh ya ki khynnah skur wa wan wow embynta lang ha kani ka sngi wa kynthup ya ka Nephington Memorial Secondary School, Wahiajer, Mukhla Raij Secondary School, Mukhla, Ummulong Presbyterian Higher Secondary School, Church of God Secondary School, Ummulong, Lissi Pearl Secondary School, Lad Mukhla.
Ka Dr. (Mrs) F. Rymbai, Sr. AH. & Veterinary Officer, VTC, Khliehtyrshi, da khana ko ya i thmu yong kani ka prokram wei yei emkaam wow yada nei kjut Rabies wei yei emkaam wow e Inject ya ki mrad wa ri ha yung. Da baan joor ko yei emkaam wow pynman chooh chooh ya ki pynsñiawthooh paidbah chaphang i kjut Rabies neidaw wa man i iwa maa wa chim yei mynsien ki bru wei deiwa pynemkaam lang ya ki khynnah skur yow pynsñaiwthooh ya kani ka jait kjut daw yarap ko yaka juk wow wan.
U symbood kongsan ha kani ka sngi u Dr. D.I. Kjam, Assistant Director Disease Investigation, Shillong, kamjooh u Vice President ka MVSA Apex Body, da e khublei u yaka Jaiñtia Hills District Unit ka MVSA da ye ko wow pynman ya kani ka yalang wa emkaam. Da klam u leh chaphang ini i kjut iwa ye u chim yei mynsien ki bru lada ym yoh yei sumaar heipor wei da pynchlur u wow yaleh pyrchah ya kani ka kjut deiwa e Injection ya ki mrad wa ri wei chaphang kani ka Scheme wa yarap da ka sorkar.
U kongsan u H. Shylla, Assistant Licensing Officer, JHADC, hei klam yong oo da yaroh u yaka MVSA-JHDU, yei leh warom ki ya kani ka World Rabies Day 2019. Da kyntu u leh ya ki khynnah wow ap bniah ya i sikai ki Veterinary Doctor wei wow rah leh yaka khubor cha ki yung ki sem yong ki kamjooh cha ka imlang sahlang yow poi cha ka thong ka World Health Organisation kawa ong “Zero by 30” namo wow pyndooh yei dooh yei mynsien bru na i kjut Rabies ha su snem 2030.
Yei ktien e khublei ya i bynta wa sdang kani ka sngi da e da Dr. F.R. Shadap, Secretary, MVSA-JHDU.
I bynta wa ar kawa man leh ka Technical Session da pynlai da ka Dr. (Miss) E. Passah, Sr. A.H. & Veterinary Officer, Poultry Farm, Jowai. U bru chemphang (Resource Person) toh u Dr. P. Sumer, A.H. & Veterinary Officer, uwa da e yei klam chaphang ka kjut “Rabies.”
Hadien ini da pynman leh yaka Quiz Competition wa chimbynta da ki 5 tylli ki skur wei u Quizmaster wa pynlai yaka toh u Dr. F.R. Shadap.
Ya kani kakob da jop ka Nephington Memorial Secondary School, Wahiajer, ka Ummulong Presbyterian Higher Secondary School da yoh wa ar ko katwa ka Mukhla Raij Secondary School da yoh wa le ko.
Discussion about this post