Da wai yaka thaw pyllang symbe rep tyrne da ka SURE ha Mulum

Jowai: Kam chibynta yong ka thong (Project) ‘No one shall be left behind’ kawa hapoh i yahkhmat ka North East Slow Food and Agrobiodiversity Society (NESFAS) deiwa ya krehlang wa ki seiñ kreh mon sñiawbha kam ka Society for Urban and Rural Empowerment (SURE) wa ka North East Network Nagaland, da wai ynne ka sngi 30 tarik ya ka thaw pyllang symbe jhoor wa kyrpang lane ka Community Seed Bank haka chnong Mulum West Jaiñtia Hills. I thmu yong ini i booh ya kani ka thaw wow pynneh pynsah ya ki symbe kawa da pyllang da kynchew toh wow pynneh pynsah ya ki symbe tynre kiwa na kini ki loom yong i hi.

Ya kani ka thaw pyllang thaw yada ya ki symbe da seiñ da ka dhab Participatory Guarantee System kawa da tip kam ka Ïaraplang Local Group wei ya kani ka thaw pyllang symbe da tip kam ka Ïaraplang Community Seed Bank, Mulum Laskeiñ Development Block, West Jaiñtia Hills.

Hawa batai chaphang i sdang yong kani thaw, ka Hamsniawpher Suchiang kawa man kam kawa yahkhmat kani ka Group da pyntip ko wa nachwa da em kam kani ka kynchew symbe ha kini ki thaaiñ kawa da kyrchaan da ka District Basin Development Unit West Jaiñtia Hills, tangwa da kut noh ko, tangwa katni da pynim biang da ki wakreh ka SURE.

Hawa klam kam u kongsan, u A. Malang uwa man u Horticulture Development Officer hapoh ka Laskeiñ Develpoment Block, da ong u wa i wan ki symbe thymme man ko neibynta wow kyntu yaka rep ka riang wei wow pynku yaka yoh ka kot yong ki warep. Tangwa da pynkynmoo u leh ya ki warep wa ym toh u mylliñ ya ki symbe tynre næ ki symbe kiwa i da yoh pateiñ i na ki bei ki pa tymmen yong i.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

U H.H. Mohrmen uwa pynlai yaka yalang wow wai ya kani ka Community Seed Bank da ong u wa nalor wow pynneh pynsah ya ki symbe tynre, kani ka Project u yaleh ko wow sikai wei wow pynchlur ya ki nongkyndong wei khamtam ki warep wow baam da ki baam kiwa tei yei doh i pran kiwa ye u yoh na ki kpær wei kamjooh ki jhoor khloo kiwa ye u yoh na ki soodong sookun. Lyngba kani ka Project da kyntu leh ya ki Midday Meal Cook wei kamjooh ya ki Anganwadi wow pynemkaam leh ya ki jhoor khloo khnang wow yoh ki khynnah ya i baam wa tei yei doh i pran.