Jowai: Ka yung krehkaam yong ka District Legal Services Authority, West Jaiñtia Hills District kam chibynta ki kaam yong ki Student Legal Literacy Club haka 30 tarik u Naikhynde da pynman ko yaka yakob Quiz, Debate waka Extempore Speech Competition ha Thomas Jones Synod College Jowai heiwa da pynlai daka D. Sohtun Secretary District Legal Services Authority, WJHD.
I pynman ya kini ki yakob man leh chibynta ka thong wa haap hapoh ka National Legal Services Authority Action Plan 2019-2020 wei da wan wow chim bynta da ki skur waki College waphær waphær ka West Jaiñtia Hills District.
Haka yakob Debate da yoh nyngkong u Emboklang Papeng naka Thomas Jones Synod College Jowai, wa ar ka June Niang naka St. Mary Mazzarello Higher Secondary School Jowai, wa le won ka Sachita Syrti naka skur Govt. Boys Higher Secondary School, Jowai.
Haka Extempore Speech da jop ka Sowankani Pohrmen naka Nongtalang College Nongtalang, wa ar u Chatis Phawa naka Kiang Nangbah Govt. College Jowai, wa le won ka Chisaddonhi Mukhim naka Thomas Jones Synod College Jowai.
Haka yakob Quiz da yoh nyngkong ka skur KJP Synod Mihngi Higher Secondary School Jowai wada mihkhmat da u Murshed Akhter wa u Phrangsngi Shylla, wa ar da yoh daka Kiang Nangbah Govt. College Jowai, wada mihkhmat da u Pynshngaiñ Dkhar waka Bianghun Kyndait, wa le won ka Thomas Jones Synod College Jowai, kawa mihkhmat daka Ridulan Tariang wa ka Daphibiang B Nikhla.
Discussion about this post