Jowai: Ka West Jaiñtia Hills District Administration ynne ka sngi da kynmoo warom ko yaka lyngkhooh snem wa 150 ka sngi kha u Mahatma Gandhi deiwa pynman yaka pynkhooid chnong khamtam ha ki yaw wa em ha Jowai deiwa ya krehlang waka Municipal Board, Jowai Officers Club, ki Market Committee, kiwa chong dai wa ki khynnah skur.
U MLA ka Jowai u Wailadmiki Shylla da embynta lang u ynne haka pynkhooid chnong wei hei klam yong oo haka yalang wa pynman chwa wow sdang, da pynchlur u ya ki paidbah wow em ki ka kitkhlieh wow chim yaka kular wow pynman yaka chnong Jowai kawa khooid khamtam ki bynta wa em ki yaw dei wym noh roi ya ki jhep cha rood sarok iwa pyntaroi wei kamjooh daw ktah ko yei chait i khiah lada ka soodong sookun man ko kawa tngit.
Ha kani ka sngi u MLA leh da wai paidbah u yaka Angikaar Campaign hapoh ka District.
U Xavier Sun, Social Development Specialist PMAY (U) da klam u chaphang ka thong yong ka Angikaar Campaign wow wanrah yei kylla haka imlang sahlang wei kamjooh kammon wow pyllang jhep, pyllang um wei wow pynduna i pynemkaam ya i bordiñ.
U Deputy Commissioner u Garod LSN Dykes, u Superintendent of Police u Lakador Syiem, ka Additional Deputy Commissioner ka R S Manners, ki EAC ka D. Syngai waka Y. Mawlong, u JHADC CEM u Thombor Shiwat wa ki MDC da chimbynta lang ki ha kani ka pynkhooid chnong.
Deiwa chimbynta lang wa ka ri waroh kawi, ka District Administration deilang waka yung krehkkam ka District Sport Officer da pynman ki yaka “Plogging Run” (I lai kjat wei jied jhep cha luti) nadooh Kiang Nangbah Stadium hadooh ha laad Kiang Nangbah Government College, Myntdu By-pass, Amlarem By-pass, Stand War, DC Office, Ladthadlaboh wei da lai biang cha Kiang Nangbah Stadium.
Ka Fit India Plogging man ko leh ka Campaign wa da sdang da ka sorkar India yow pynman ya ki paidbah kiwa chait wa khiah deiwa lai kjat namo u phet wei jied ya i jhep wa chem cha luti syngkeiñ.
Discussion about this post