Jowai: Ka Dorbar Chnong Madankynsaw-Mowkyndeng ynne ka sngi da lehwarom ko yaka sngikha u Mahatma Gandhi da ki kaam kiwa boonjait khamtam hawa yatoh wow pynkhooid yaka chnong ka thaw kawa man kawi na i angnood yong uni u bru khroo.
Da sdang ya ki kaam nadooh 7:30 i step da ka pynkhooid chnong ya 5 tylli ki dong yong ka chnong wa da ya chimbynta da kawi pa kawi ka manyung ka chnong. Ha i por 9 waje i step da em ka pynsñiawthooh paidbah hajrong ka Swachh Bharat Mission na ki wakreh ka chnat PHE wei da pynbood da ka yakob thaw khia ya ki Plastic wa da pyllang ha man ki dong. Ha kani ka yakob da wan nyngkong da ka Dong Pyrdi Chnong (83.36 kg), da wan wa ar da ka Dong Knorsyiem (57.63 kg) wa le da ka Dong Newhill (37. 52 kg).
Ha kani ka sngi la pyllait wei pyntipmit paidbah leh ya ki “Street Angels” yong ka Dorbar Chnong, ki wow e sikai yaki paidbah wei ha i jooh i por wow pyllang yaki Plastic haki luti syngkeiñ yong ka chnong kamwa chi kynta man ka sngi hadooh wa waroh ki paidbah yong ka chnong u ye ki u chim ya katai ka kitkhlieh.
Haka i por 12:00 waje pyrdi sngi da em ka yakob khwe Plastic kamwa chi kynta ha ka wah Tyngkla, kawi na ki wah dooid wa jooh pynemkaam kiwa chong chnong wow sum wow sait that, wei ha kani ka yakob da wan nyngkong da u Kitdor Shadap, wa ar da u Lammiki Tyngkan da wan wa le da ka Ridahun Biam wei da yoh wow khwe kamwa 47 kg ki Plastic na katai ka wah.
Hawa kut yong kani ka program ka chnong da yoh ko wow pyllang kamwa 250 kg ki Plastic wei daw e kti ya ki cha ka chnat PHE yow leh ya iwa emkaam.
Da e khusnam leh cha waroh kiwa jop yong kani ka sngi da ka poisa wa ki Trophy.
Neiliang yong u waheh chnong u D. Shadap da pynsñiaw u yei sñiawngooh ya ki khon yong ka chnong wa da chimbynta chongchit ki ha kani ka sngi hanlada pynwit u slap.
Discussion about this post