Shillong: Kiwa chong chnong ka Khliehtyrchi, West Jaiñtia Hills da pynbaad ki wa em i baam-tooh wa joor ha ka chnong da u Waheh Chnong hadooh wa ym em wanrah u ya ka yukheiñ ha i lut i sep yong ka chnong kattu la le snem hadooh wa da kut ka samoi krehkaam, hajrong ini neiliang kiwa chong chnong wa kam wa em ki palat 600 ngut da dawa ki na ka Jaiñtia Hills Autonomous District Council (JHADC) wow thung da ka takit wa laitlooid wei wow thung chwa leh da u Acting Waheh Chnong katwa ympu ye wow e ya ka yukheiñ waroh yong kini ki le snem.
Hawa yaklam wa kiwa pathai khubor ynne ka sngi ha Shillong, u Wanbud Dkhar da ong u wa neiliang kiwa chong chnong da ujor ki yeini i leh u Waheh Chnong, u Kitbok Rymbai cha ka JHADC kawa da thung leh da u Dolloi ka Elaka Jowai wa pait ya ka synchaar chnong, u Puramon Kynjing wow takit hajrong ini i kaam tangwa neiliang u Dolloi da chah liang u cha u Waheh Chnong neibhah ym em lai u katkam ki kyndon krehkaam, wei ha ka 3 tarik uni u bnai u Dolloi da wan pynbna u ya ka tarik wow jied ya u Waheh Chnong wa thymme ha ka 21 tarik uni u bnai.
Da pynbaad u wa u Dolloi da tyngkheiñ u ya ka aiñ, JHADC Establishment of Elaka and Village and Election Appointment Power Function and Jurisdiction of Dalloi, Sordar and Waheh Shnong Act, 2015, kawa kdaw che wa u dolloi ymye u wow lai lait ya ki aiñ wa da chna da ka Council tangwa kamwa yoo ha ini iwa jia ha Khliehtyrchi u Dolloi ym em bood u ya ki kyndon næ ki aiñ yong ka JHADC.
Da ong u wa kam kiwa chong chnong ym pdiang ki yeini i leh u Dolloi wei ym pdiang ki leh yei tyrwa u Dolloi wow pynman da i jied Waheh Chnong kat wympu ye u pynche ya i lut i sep ka Executive Committee kawa rim.
Da ong chooh chooh u wa kam kiwa chong chnong da thoh ki leh cha u CEM ka JHADC, u Thombor Shiwat wa cha u EM wa pait ya ka Elaka, u Phasmon Dkhar wow chimkhia ya ini i kaam.
Discussion about this post