Jowai: Ki ar seiñbhalang na ri-loom Jaiñtia wa kynthup ya ka Synjuk Waheh Shnong Ri Jaiñtia (SWSRJ) Saipung Sirdarship hapoh i yahkhmat u President u Zosiama Thianglai wa ka JYF-Saipung Circle hapoh i yahkhmat u President yong ka, u Oswald B. Nampui da lai yachem ki wa ki heh ka NEEPCO wow booddien yeiwa jia ha ka 7 tarik uni u bnai.
Kam wow pynkynmoo heini, ha ka 7 tarik da pdung uwi u pipe ka Power House ka NEEPCO wa em ha Umrangso heiwa da wiar uwi u Junior Engineer, u Robert John Ngamlai uwa na ka chnong Lura Saizol, East Jaiñtia Hills wa kiwi tawon ki wakreh kani ka Company.
Ki ar seiñ da beiñ ki ya ka NEEPCO neibhah wa nadooh wa jia ini i pdung pipe ha ka 7 tarik heipor 4:00 waje i step tangwa ka NEEPCO da pyntip ko ya kiwa hayung kiwa da wiar yeiwa da jia du ha ka 8 tarik i janmiet wei ym em u ujor FIR ko leh iwa pynyoo yei khalær i rukom krehkaam yong ka.
Chooh chooh ki ar seiñ da ong ki wa katkam ki khubor wyrta da ong wa ka NEEPCO ymem u kreh næ chna pynmiat (Repair) ko ya ki tiar nadooh u 1986 iwa man 33 snem kattu wei yeini ki ar seiñ da chem ki wa man i iwa sakhiat.
Neiliang ki heh ki ar seiñ da yachem ki ya u DGM ka NDRF wa kiwi kiwi kiwa emkti wow pynlait wow thooh ya kiwa wiar (Rescue Team) deiwa kyntu leh ya ki wow thooh ya ki metyap yong kiwa da wiar kattu la 9 sngi khlem chem.
Hadien i yachem neiliang ki heh ka NDRF wa ka NEEPCO da kular ki wow thooh ya kini kiwa wiar neibhah kiwa khih mylla, ki kor, ki NDRF wa kiwi kiwi dang pteiñ ki wow thooh ya kini kiwa da wiar.
Discussion about this post