Shillong: Ka rai yong ki paidbah ka Shella Constituency wow sai MLA thymme ha ka Election chiteiñ samoi da kut noh ko ynne i janmiet heiwa da wan poi 84.56% kiwa thap Vote hadien wa yoh yukheiñ na waroh 58 tylli ki Polling Station.
Hawa yaklam wa kiwa pathai khubor u Chief Electoral Officer (CEO) ka jylla, u Frederick R Kharkongor da ong u wa ka Election chiteiñ samoi ha Shella da man ko kawa lai bait khlem iwon iwon i tkhoh lait na i thut kawi ka kor EVM ha Laitïam Polling Station ya kawa da kylliang noh.
U CEO da ong u wa hadooh 5:00 i janmiet wa khang yei thap Vote da wan 79.83% kiwa thap wei ka yukheiñ kawa pura da yoh wa da wan 84.56%, iwa man 25191 ngut na ki 29790 ngut.
Ha Shella da sakhi wa ki chynrang da tam ki kajiak ya ki kynthai heiwa ki chynrang da wan ki hadooh 12631 ngut, katwa ki kynthai won 12560 ngut.
Katkam i ong u CEO ka Polling Station wa boon tam kiwa thap Vote kiwa mih em ki ha Wah-U-Tim heiwa da wan hadooh 92.86% wei ka Polling Station wa duna kiwa mih toh ka MeSEB-MCCL heiwa da wan poi du 47.37%.
U Kharkongor da ong u wa da em kawi ka Model Polling Station, kawi ka Green Polling Station, kawi ka Polling Station neibynta kiwa duna i doh i pran wa ar tylli ki Polling Station katwa neibynta ki kynthai da khut kam ki Pink Polling Station.
Da ong u leh wa kani ka Election rap phær ko neibhah wa da phah ya ki wyrta deiwa pynemkaam da u Satellite cha ki thaw wym yoh Network Mobile Phone.
U CEO da ong u wa kani ka rukom phah wyrta toh kawa da pynemkaam da ki chipai Indian Air Force wa ka chnat Railways ya kawa da tip kam ka Sky Low næ ka Narrow Band.
Chooh chooh u CEO da ong u wa ha kani ka Election ym em u yoh kem poisa tangwa da kem yei kiad kawa man 823.67 litre iwa chondor palat T. 1.42 lak.
Hawa kyruiñ won cha i pynkhreh ya ka sngi ñiaw vote, u CEO da ong u wa ka chnat daw pynneh ko ya ki pulit CAPF ha ki thaw wa booh ya ki kor wei daw em leh sa ki pulit ka jylla.
Da ong u leh wa i ñiaw vote u man i ha yung krehkaam u Sub Divisional Officer ka Sohra, ka wow sdang nadooh 8:00 i step ha ka 24 tarik uni u bnai.
U khulom wa pynemkaam ha kani ka Election uwa da chna kyrpang uwa em wa i symbe dieñ
Discussion about this post