Jowai: Ka Bharti Foundation man ko kawi kawa pait bniah yei bha yei miat ki skur ha West Jaiñtia waka East Jaiñtia wei da pynman ko ha uni u snem ya ka Nutrition Day haki le tylli ki skur. Ya kani ka program da pynman ha Ladmukhla LP & UPS, Kiang Nangbah LP & UPS waka Jowai Dulong LP & UPS haka 12 tarik wa 13 tarik uni u bnai.
Da pynman yaka Nutrition Day wa kyrpang ha kini ki ar sngi ha ki jar jiar ki skur heiwa da pynsñiawthooh kyrpang yei bhah i baam wow tei yei doh yei pran wa manka sngi. Ha kani ka program waroh ki khynnah kiwa da yachim bynta da poi ki cha ka 428 ngut ha waroh kitai ki skur.
Da pynchongchit ha kini ki sngi da ki program kam ki Drawing Competition, Extempore Speech, i pynsñiawthooh neibhah i baam. Ha Ladmukhla da yoh yei klam cha ki khynnah skur naka Daia Sari chaphang i baam i dih wow tei yei doh yei pran ryngkat wa i baam ja sngi wa da pynkhreh yaki khynnah ha katai ka sngi yow man i baam wow pynyoh yei chait yei khiah. Ya kani ka program da pynman da kitai ki 3 tylli ki skur ryngkat i ya krehlang waka Bharti Foundation, West Jaintia Hills District.
Neiliang ka Bharti Foundation Jowai da e khublei kyrpang ko ya waroh ki Headteacher wa kiwa sikai kitai ki skur waki khynnah wa da ye u pynman yaka program kawa lai bait lai ryntih wei man ko kawa jop .
Kani toh katkaam i pyllait khubor naka Dayoophika Khyriem wa man leh ka Academic Mentor yong Bharti Foundation ka West Jaintia.
Discussion about this post