Ha chwa u sdang ka Kopati Puja yong ka Raij Raliang waroh ki khon ka Raij ka chnong ka thaw da pyllum pyllang ki yow kba u khoo na sar pynthor na sar i bhin u poi suk poi saiñ u cha yung cha sem yow pyndep ya ka dung khoonær da ka ngooh ka dem u wa paan chiar næ kawa paan chiar chirup lang wa ka Raij.
Heitæ u kieh u kdur ka ksiñ ka mieñ da thai ka chnong ka thaw da chongchit ki khynroo khyndaiñ kiwa heh wa sian wa da poi ka Kopati Puja.
Kamtæ ka Kopati Puja kamwa jooh pynman ya ka man u snem, ha uni u snem leh daw pynman ya ka ha ka 25, 26 wa 27 u Khonchonglad (November) 2019 ha chnong Raliang heiwa u Wamon, u Dolloi, u Pator, u Langdoh, u Pamsniñ, ki 7 Waheh, u Harmuid, ki Dhulia, ki Wasan, u Chutia, u pyndep ki ya ka kñia ka khriam chirup wa ki 5 Langdoh langpung na ka Raij Raliang, ka Raij Niawkmai, ka Raij Ionglang, ka Raij Lapnei, ka Raij Khonchnong ha Khlooblai Puja.
Hadien ka lehniam sa ka pyrstieh Niam u pynphooh pynphieñ ki 5 Langdoh na waroh ki San Raij, heijooh i por ki khynroo waheh u pynphooh pynphieñ chooh chooh ki sa ka pyrstieh kynrih ha Madan Khloo Puja wa ka chaad ka put ka tem ha Madan Seiñ Raij Chrah-Umphula na waroh ki Dong ki kyntoit yong ka chnong Raliang wa na Nongkynrih, Laskeiñ.
Ka Kopati Puja u e ngooh e dem ko ya u Trekirot uwa booh wa thoo wa e u dei chait dei tram, ha waroh ki soo samoi wa da ye u khih u khan u lum u lang ya u khoo u kba, ya ka spah ka phaw, i stat i tip, ha waroh chisnem lynter, kamjooh leh u kyrkhu kyrdoh ya u snem wa daw wan yoh u biang u dap u snem u manai yong ki khon ka Raij u chnong u thaw.
Discussion about this post