Jowai : Hadien wa boon ki paidbah ka thain Namdong, West Jaiñtia da ood yei wym biang i rukom sumar rukom kreh ka PHC wa em ha ka chnong Namdong kawa da wanrah yei boon i eh kiwa boon ki liang, ynne ka sngi 24 tarik ka seiñ Federation of Khasi Jaintia & Garo People (FKJGP) deilang wa ki dkhot ka San Chnong Development Committee Namdong da lai li hiar ki cha kani ka PHC.
Ha ini i lai pait lai sylli da chem chiboon i duna nadooh ki nurse khamtam ki doctor wa pyllai ya kani ka PHC nadooh wa mih u Dr. S.K. Shylla wei hadooh katni ym pu yoh doctor ha kani ka PHC lait noh ka Dr. J. Laloo (AYUSH) wa u Dr. H. Challam (Dentist).
Hawa yaklam wa ka Dr. Laloo da pynsnaiw ko ya i eh i khoo hei yatoh wow e ya i chakri wa paka cha ki paidbah neidaw wa ym em doctor (MBBS), i duna ki nurse kamjooh yei wym biang ki dawai dachin.
“Nei liang yong nga hanlada ym toh ki kamram yong nga leh, tangwa yow yarap ya ki paidbah nga da yaleh u oo katwa ye i bor yong nga” ong ka Dr. Laloo.
Da ong ko leh wa hei yatoh wei i eh wa chem ka PHC nei por cha i por ha ki meeting wa u DM&HO da pyntip ki ya waroh iwa chem chitom ki tangwa hadooh katni leh neh i kmajooh bait.
Neiliang u president ka seiñ ka FKJGP Jaintia Hills u T. Lytep da booh u ya i kyrpad ya ka sorkar yow pynbiang yei emkaam kani ka thaw sumar yow yoh myntoi ki paidbah wei kamjooh yow pynku kyrdan ya kani ka PHC cha ka CHC.
Kiwa yahkhmat ka San Chnong Development Committee Namdong da ong ki wa boonsien hi, tang kam ya ki kjut prai, pynhiar leh kani ka PHC ym ye ko u sumar, katwa ya kiwi ki kjut wa rap joor boonsien hap lai ki cha ka Nartiang PHC wei da chah kyntait ki deiwa ong ya ki wa iyi i daw wa ka PHC Namdong ym ye ko u sumar ya ki. Kamtæ kani ka seiñ kyrpad ko ya ka sorkar yow chimkhia ko ya ini i chem chitom kani ka thain.
Discussion about this post