Jowai : Hajrong ka thong wa ka nongrim wow pyndep yei kaamram hapoh ka imlang sahlang, wei kamwa da yah daka Sorkar-Bei yaka Swaach Bharat, chim ki bor pait, bor pyllai ki 3 tylli Unit ka Scouts, Guides wahap hapoh ka Thadlaskeiñ Block wow pynman ya ka Cleaning Drive.
Ha kani ka sngi Musiang 25 Naisan, Ki Scout Master, Guides Captain yong ki 3 tylli ki Unit wa em hapoh ka Thadlaskeiñ Block dachim ki wow pynman yaka Cleaning Drive ha Iawpynsiñ wa em ha Wahiajer heiwa ki khynnah Scouts, Guides na ki 3 tylli ki skur wa kynthup ya ka Church of God Sec. School, Ummulong, ka Mukhla Raij Upper Primary School, Mukhla waka Nephington Laloo Memorial Sec. School, Wahiajer dawan ki wow yachimbynta.
Ha kani ka sngi chwa wow sdang i pynkhooid da em chwa ka yalang yahkhmat watbian hei pyllai u ma Teilang, Scouts Master COG Sec. School Ummulong heiwa u ma Kmenlang Shylla, Waheh Chnong ka Wahiajer, u ma J. Marbood Kyndiah, Principal COG Sec. School Ummulong wa kiwi kiwi ki dkhot ka Dorbar Chnong Wahiajer dawan ki wow yaemlang ha kani ka sngi.
Ka kong C. Susngi, District Orgainser Guides, West Jaintia Hills District hei e ya ki kyntien ha kani ka yalang, da kdaar ko wow booh ki kyntien dei wa ong, ka thong i pynman ya kani ka Cleaning Drive toh kam chibynta wow pyndep yei kaamram ki khynnah Scouts, Guides kiwa yatoh wa ka imlang sahlang neibhah hapoh ka Scouts Guides Movement ki khynnah em ki chiboon ki bynta wow leh neibynta i miat i bha ka imlang sahlang kiwa man ha ki dur ki rukom waphær waphær.
U ma Kmenlang Shylla hei pachat ya ki kyntien hapyrdi ki khynnah, da ong u wa em hapoh ka imlang sahlang toh iwa emkaam tam, uni u waheh yaroh u leh ya ki khynnah Scouts, Guides yong ki 3 tylli ki skur kiwa dachim ya kani ka yukit hei wow wanrah yei khooid i pliah ka yaw ka syiem wa em hapoh ka chnong yongki. Ong chooh chooh u leh man iwa yoosuk u pait yei man i long ki khynnah Scouts, Guides neibhah, ki em ki ka bynta warap kyrpang hawa nujor wa kiwi ki khynnah, kamtæ kitbok kitrwiang u yaki khynnah Scouts, Guides dei wa ong, yooluti lyngba ini i kaam wabha yongphi u man ko ka nongmuna wabha ya kiwi tawan ki para khynnah.
U ma J. Marbood Kyndiah, hei klam yong oo da khana u yaka thong yongka Sorkar India hei wow wanrah yei khooid i pliah ka chnong ka thaw wa kiwi kiwi ki bynta lyngba ka Swachh Bharat Mission. Ong u leh ya ki khynnah u kynmoo ki hawa u chim ki u pynkhooid yaka yaaw ka hat, wei ymtoh u mynlliñ u wan u pynkhooid yei yung i sem yongki wei wow man leh ki bru wow yahkhmat hapoh ki chnong ki thaw mynstep mankawi heiyatoh wow wanrah yei khooid, i pliah ki soodong sookun ka chnong ka thaw.
Discussion about this post