Shillong: U Montri Rangbah ka Meghalaya, u Conrad K Sangma, da ong u wa ka Meghalaya Residents Safety and Security (Amendment) Ordinance, 2019 ym ktah ko iyi iy leh yei wa wan kiwa uiñ pyrthai hapoh ka jylla.
“Ka Ordinance ym ktah ko ya ka kaam uiñke suwari ha kani ka jylla, wei man ko du i sñiawthooh bakla ya kiwa wan ke,” da ong u Conrad hawa yaklam wa ki laad pathai khubor ynne ka sngi.
Da ong u wa kiwa wan uiñke suwari hadooh katni hap ki wow pynpsiah pyrtuid (Register) ha ki Hotel. Tangwa lyngba kani ka aiñ hap ki wow pynspiah pyrtuid noh wa ka sorkar.
“Hawa lai phi cha Mumbai næ Delhi, hap phi wow pyntipmit ha ki Hotel wei ha kani ki jylla, kamjooh i neini leh phah pyntipmit i ha ka sorkar,” ong u Conrad.
Da ong chooh chooh wa man ko ka jooh ka rukom pynpsiah pyrtuid wei lada kiwa wan uiñke sñiawthooh bha ki ya ini, ym sñiawphær ki neibhah ini leh man ko ka bynta i chngaiñ wa i bha i miat ya kiwa wan na baar wei kamjooh ya ki paidbah ka jylla.
Ha iwi i liang, u Conrad da ong u wa tikna wa u Lat daw e u yaka muhor ya kani ka Ordinance, deiwa ong wa ka sorkar da phah ko yaka file cha u Lat wei hap sa du wow yang yei mynjur u Lat.
Hawa yatoh i klam u montri ka sorkar pyrdi wa pait yaka DoNER, u Dr. Jitendra Singh uwa da ong wa ym emkaam wow pynpsiah pyrtuid ya kiwa uiñke suwari ha Meghalaya, u Conrad da ong u, “I klam yong u montri ka sorkar pyrdi man i iwa toh neidaw wa hadien wa ya ka Ordinance da e muhor da u Lat daw krehkaam ko. Katwa neiliang ka sorkar jylla da dep wow mynjur wei i kyrmen leh wa u Lat daw e u yaka mynjur ha iwon iwon i por.”
Katkam ka yutip wa da yoh, u Lat u Tathagata Roy dang paan yumut u na ki stat aiñ ha chwa wow e yaka muhor.
Kani ka Ordinance ym krehkaam ko yaki tre chnong lada man ki jait bru ri-loom næ kiwi, ki warkeh ha ki ophis ka sorkar pyrdi wa ki chipai ki wym hap wow pynpsiah pyrtuid.
Discussion about this post