Shillong: Kiwa sikai ka jylla ynne ka sngi da pynbna ki wa da seiñ ki ya kawi ka kynhun wa tip kam ka Federation of All Schools Teachers of Meghalaya (FASTOM) ha ka 14 tarik, Naikhynde uni u snem. Ha kani ka seiñ yong kiwa sikai ki dkhot kam ki Executive Member kynthup ki mar ar ngut na ki Association kiwa sikai.
Hawa klam wa ki laad pathai khubor, u President ka Federation, u Kenneth Shadap da pyntip u wa ki phang krehkaam wa hakhmat dooh wa kani ka kynhun wa thymme kiwa sikai da booh wow pyndoohjait da i stat ya i dooh i duk, i biej, i chah yoobeiñ wa i sahdien.
Da pyntip u leh wa ka seiñ u kreh ko neibynta wow pynku yaka imlang sahlang, wow yakhun neibynta ki hok yong kiwa sikai yow yoh ya i su katkam i kaam, wei wow pynyoh leh ya ki bai dawai hawa kjut wa chitom nalor ka bai baam tymmen.
U Shadap da pyntip u leh wa ka Federation da booh thong ko wow dawa na ka sorkar wow booh noh da ka Education Commission.
Hawa kylli iyi emkaam ka Education Commission, uwa yahkhmat ka FASTOM da ong u wa lada ka sorkar ye ko wow wanrah da ka Commission, yei eh kiwa khian, ye wow bichaar khlem emkaam wow lai cha kashari neibhah kamwa man katni lada em iwon iwon i eh wa kiwa sikai yachem ki, boonsien hap ki wow lai cha ka kashari wow yoh ya i hok.
Discussion about this post