Jowai: Ki dkhot yong ka Hill Farmers Union (HFU) ha ka Organic Festival kawa la tip kam ka 7th National Biennial Convention on Organic Farming kawa man ha Udaipur da lai pynyoo rong ki yaki symbe jhoor napoh ka jylla ya kiwa da wan sakhi da kiwa boon ki bru napoh ka ri wa kiwa na baar ri.
Ki warep yong ka HFU hapoh i yahkhmat u Allfondbirh Kharsyntiew, General Secretary yong ka seiñ da rah ki chiboon ki symbe tre ri kiwa khlem e dawai. Napyrdi ki symbe wa da rah da ka seiñ, kynthup ya ki symbe yanem, pathoo, sumrit, sakhia wa kiwa boon jait ki jhoor wa ki soh.
U Commander Shangpliang, President yong ka HFU da pyntip u neiliang yong ka seiñ daw rep wei pynroi ko ya kini ki symbe kiwa khlem e dawai heiwa daw saam cha ki warep wa cha ki jylla waphær waphær. Tangwa yow pynman kaam ya ini i emkaam ya i krehlang yong warep wa i kyrchaan yong ka sorkar.
U Shangpliang da kyntu u ya ki warep kiwa em thaw wei kamjooh leh ya ki bru kiwa kwah wow yarap ya i rep wow yarap wow e thaw kyrpang ya ka seiñ wow pynroi ya kini ki symbe na ka jylla yong i. Da kyntu u ya ki warep wa ki bru rangbah kiwa smat wow yarap yaka seiñ wow phone ha u number 9863512121.
Da ong u wa ka sorkar barabor ka jooh wanrah ko ya ki symbe kiwa na baar wow saam cha ki warep, tangwa neini chakhmat tow wow yarap u kyntu ya ki symbe yong i hi. Da kitbok u ya ki dkhot yong ka seiñ wow yoh ki yei doh i pran met wa chait wa khiah ha ka Organic Festival kawa 3 sngi ha Udaipur.
Discussion about this post