Shillong: Ka kynhun ki kari kamai hapoh ka lama ka Joint Coordination Committee of Commercial Vehicles (JCCCV) da dawa ko ynne ka sngi na u montri ka chnat pynlai kari u Sniawbhalang Dhar wow booh noh ka sorkar da ka rukom krehkaam kamwa leh ha jylla Sikkim, wa kiwi ki jylla, wow khang ya ki kari wa nabaar wow kit wow pynchang ya kiwa uiñke suwari cha ki kdong ki chmiang ka jylla.
Hawa klam cha ki laad pathai khubor, hadien wa da yachem wa u montri, u Secretary u Kordor L Mawlong wa u Chairman u Wandonbok Jyrwa da ong ki wa kamwa man katni i wan kitbru ki kari Tourist Taxi na Assam, da pyndooh nong ko ya ki Tourist Taxi na ka jylla, heithaw wow man ko ka laad kamai ya ki khynroo ka jylla wow yoh kaam yoh jaam.
Da ong ki wa ha ka chi sngi, kamwa 5-6 spah tylli ki kari kamai na Assam da wan chang ki cha kylleiñ ki thaw lai paitke ha Meghalaya.
Da ong u wa da e yumut ha u montri wa toh u khang laad ya ki kari na Assam wa na kiwi ki jylla, wow lai chang ki kylleiñ wei wow booh noh ya ka thaw yieñ ki wow pynhiar ya kiwa wan uiñke suwari yow chim ki da ki kari na kani ka jylla yow lai yah ya kiwa uiñ suwari cha kylleiñ ka jylla.
Da pyntip wa neiliang u montri da e yumut u ya ki wow yaklam bha wa u montri rangbah ka jylla u Conrad K Sangma, uwa ksoh yaka chnat Tourism hajrong ini.
Kiwa yahkhmat ka JCCCV da pynsñiaw ki wa katni em ki i thaw pynieñ kari ha Polo, heiwa ki kari Tourist Taxi na baar jylla kiwa wan kitbru wa wanke chapoh ka jylla wow pynyieñ ki wei netai won daw kit da ki Taxi kamai napoh ka jylla ya kiwa kwah wow lai ke cha kylleiñ ki thaw, kawa man kam ha Sikkim, wa kiwi ki jylla.
Da ong wa ki ym pyrchah ki yei wan kit ya kitu kiwa krehkaam sorkar, kiwa kreh samen cha kani ka jylla neibhah ki em ki da ka Permit tangwa ym yahap wow kamai ki ya kiwa wan uiñke.
Discussion about this post