Jowai : Ynne ka sngi ka Khynroo Khyllood Niamtre Committee (KKNTC), Loomiongkjam da pynemwarom ko yaka lyngkhooh snem wa dap chi snem yong ka Shlem Hikai Tynre ha yungwalieh ka Loomiongkjam.
Ka Shlem Hikai Tynre toh kawa da seiñ nadooh uni u snem wada dep wow e i sikai cha ki khynnah waki khynroo khyllood kani ka chnong yow man ki kiwa tip yaka dustur riti waka niam ka rukom.
Ha kani ka sngi da man ko kawa phooh kawa yooloop bha heiwa ka yungwalieh da man ko kawa dap phiar næ.
Ha kani ka sngi u Dolloi (Acting), ka Elaka Jowai u ma Puramon Kynjiñ daman u kam u kongsan katwa u President ka Seiñraij Jwai, u ma O.R. Challam da man u kam u symbood kongsan.
Ya kani ka sngi lehwarom da pyllai da u Chairman ka KKNTC, u Kyrchan Synnah wei da yoh yaki kyntien pdiang burom na u Waheh Chnong u ma Mariphang Challam.
Da yoh yei klam na u ma Wompher Challam, u Chairman ka Niamtre, SRJ u ma KF Laloo, naka kong Artist Passah, wei da puræ yaka Report naka kong Ju Challam.
U ma OR Challam kam u symbood kongsan da e yaroh u yaka chnong wada joh ko yaka chi snem wei da kyntu u leh wa kam ha kani ka sngi ymtoh u yoo du yaki khynnah khian tangwa emkaam leh u yoo yaki khynroo khyllood ka chnong yow wan ki chakhmat ha kini ki jait kaam.
Kam u kongsan u ma Puramon Kynjiñ hei klam da e yaroh u yaki waheh wa sian ka Raij kiwa da e mynsien yaki wow sdang yaka Shlem Hikai Tynre iwa da pynskem leh nadooh u 2004 hapoh ka Seiñraij Jowai.
Chooh chooh da ong u wa emkaam u booh thong ki wow yoh myntoi na kam kani ka yung hikai niam weida ong u leh wa ki bru jngai ki naka niam toh neidaw wym em yoh bynta ki haka niam wei ka Dorbar Niam da rai ko wow bhah kaam noh ya waroh kiwa em hapoh ka Raij haki ynñiaw chnong.
Ha kani ka sngi da yoh yei rwai waki chaad wada pynkhreh daka Shlem Hikai Tynre Loomiongkjam, ka Khynroo Khyllood Committe ka SRJ, Shlem Hikai Tynre Chilliang Raij, wa kiwi kiwi.
Hachwa u kut da yoh yei ngooh i dem na u Chutia, u ma K. Phawa iwa pynbood won yaki kyntien makhane na u Secretary ka KKNTC u ma Wanmi S. Passah.
Discussion about this post