Shillong: Ka sorkar jylla ynne ka sngi da yachem ko wa ki seiñ niam kamjooh leh wa ki seiñ na kiwa yahkhmat chnong wahær waphær na ka jylla, heiwa da pynche cha kini ki seiñ wa ka sorkar em ko i jooh i yumut kamwa da kwah da ki paidbah wow dawa bait ya ka Inner Line Permit ha ka jylla.
Hawa klam wa ki laad pathai khubor, u symbood montri rangbah ka jylla, u Prestone Tynsong da pyntip u wa ha kani ka yachem neiliang ka sorkar da yaklam leh wa kini ki seiñ heiyatoh wa ka suk ka saiñ ha ka jylla, heiwa ka sorkar da kyrpaad ko ya kini ki seiñ wow ya krehlang neibynta wow wanrah biang ya ka suk ka saiñ hadien wa i pyrchah wa da mih ki ha ki sngi wa da dep.
Da pyntip u wa ini i yachem man ko kawa mihsoh neibhah kini ki seiñ da pynsñiaw ki yei yahap yumut hajrong kani ka rai yong ka sorkar wei da e yumut ki leh ya ka sorkar ha kiwa boon ki liang.
Ha iwi i liang, u Tynsong da ong u wa ka sorkar ka yieñ bait ko haka yurim wym pdiang yaka CAA, kamwa da klam nadooh wa sdang.
Ha i jooh i por u symbood montri rangbah da kyntu u ya ki paidbah wow ya krehlang wa ka sorkar deiwa pynneh ya ka suk ka saiñ khamtam ha kani ka aiom lehkmen Christmas deiwa kyrpaad leh wow kiar na kiwon kiwon ki Rally næ ki yalang paidbah
Discussion about this post