Jowai: Hadien wa u montri rangbah ka sorkar jylla u Conrad K Sangma da dep wai paidbah u yaki le tylli ki kari wa tip kam ki Demo ATM Van yong ka Meghalaya Cooperative Apex Ltd. neibynta ka Shillong, ka Tura wa Jowai haka 20 tarik u bnai wa da dep, ynne ka sngi won neiliang ka chnat krehkaam yong ka Meghalaya Co-operative Apex Bank, Jowai Branch haka yalang tbian wa pynman ha CNI Iawmusiang, da chim ka bynta wow pynbna paidbah wa ha ri-loom Jaiñtia ya kani ka kari u sdang pynkrehkaam noh.
Ya kani ka kari da kyrchaan da ka NABARD neibynta wow pynsuk yaki bru yong ka jylla khamtam kiwa cha ki thaaiñ nongkyndong neibhah wa kani ka kari daw lai ko na kawi ka thaw cha kawi wa kynthup haki thaw wa man yaw heiwa ki paidbah ye ki wow chim poisa, wow phah poisa, wow pait katwon em poisa ki, u chim ya ki Mini Statement nalor kiwi ki myntoi khlem da demkaam de wo lai jngai næ chadooh ki chnat krehkaam yong ki Bank waphær waphær.
Da ong wa lyngba kani ka kari næ Demo ATM Van ye wow pynemkaam ya waroh ki jait ATM Card kiwa na ki bank waphær waphær.
Kamtæ neiliang kiwa pynlai ka MCAB da kyrpaad ki ya ki paidbah wow chim kabu ya kani ka kabu ksiar wa da wanrah cha ki wei wow wan chakhmat neibynta wow wai yaki Account yow yoh yaki ATM Card haka MCAB, wei ym toh wow em iwon iwon i syier mynsien neibhah ini man i iwa da pynkhreh kyrpang neibynta i myntoi yong u paidbah hi.
Ha ka yalang tbian da emlang leh nadooh u Area Manager ka MCAB, Jaiñtia Hills u G.W. Biam, ka Branch Manager MCAB Jowai Branch, ka O. Lato, u Prashan Gurung BAC II, ki wakreh kani ka chnat, ki paidbah wa kiwi.
Discussion about this post