Shillong: Ka Confederation of Meghalaya Social Organisation (CoMSO), ynne ka sngi da pynbna wow pteiñ ya ka yakhih hadooh wa ka sorkar India u e ko yaka Bengal Eastern Frontier Regulations, 1873 næ ka Inner Line Permit wow pynkrehkaam ha Meghalaya, wei daw lai ko wow pynche paidbah hajrong ka CAA wa i emkaam ya ka ILP ha ka jylla hadien ka Christmas.
Hawa klam wa ki laad pathai khubor u Chairman ka CoMSO, u Robertjune Kharjahrin da ong u wa ka CoMSO u pteiñ ko yaka yakhih wow dawa na ka sorkar India hadooh wa yoh syndon ya ka ILP ha ka jylla, deiwa pynrap wa ka sorkar India toh u pdiang ko yaka Resolution yong ka yung dorbar ka jylla wei wow burom ya ka sur ki paidbah lyngba kiwa mihkhmat.
Da ong wa ini i rai yong ka jylla da phah ko yaka khubor kawa khlan cha ka sorkar India neibhah waroh kwah ki wow pynkrehkaam noh ya ka ILP. U Kharjahrin da ong u leh wa ka CoMSO hadien wa da yoh ya ka Resolution yong ka jylla daw phah chithi leh cha ka yung krehkaam u Prime Minister (PMO), cha ka Ministry of Home Affairs (MHA) wa cha ki MP ka jylla wow pynsmat yaka ILP, neibhah katkam i ong u, lada ka ILP krehkaam ko, ka Citizenship (Amendment) Act, 2019 ym em yumut næ krehkaam chooh chooh ko ha Meghalaya.
Ha i jooh i por, uwa yahkhmat ka CoMSO da kyntu u ya waroh ki paidbah ka Bri Ynñiawtrep wow ya krehlang, khamtam kiwa yahkhmat, kynthup ki MP, MLA ka jylla wa toh u yah ki nakhmat wow tynrooh cha ka sorkar India hadooh wa da yoh ya ka ILP.
Hajrong i ye ka sorkar jylla wow wanrah ya kawi ka rai wow pynkrehkaam yaka ILP ha ka yung dorbar, u Kharjahrin da e khublei u ya waroh kiwa da chimkhia, nadooh ki paidbah, kiwa synchaar chnong, ki seiñ saiñpyrthai, ki seiñbhalang waroh. Da ong chooh wa hanlada ka CoMSO ym chim ko wa ini ym toh i jop pura, tangwa man ko chibynta ini.
Ha iwi i liang u Kharjahrin da ong u wa hadien ka ILP, ka CoMSO daw chimkhia ko leh wow dawa pynkrehkaam yaka National Register of Citizens (NRC) kawa toh u em ya u snem ah pyrtuid nadooh 1971, wei wow dawa pyndam noh yaka Scheduled Tribes Presidential Order, 1950.
Chooh chooh da ong u wa ka CoMSO daw dawa wow pynkhlan ya ka Land Transfer Act, ka Benami Act, ka Trading by Non Tribal Act waka Amendment ya ka Sixth Scheduled hei wow pynhaap lut ya ki thaw ha Meghalaya kam ki thaw yong ki jaitbru ri-loom (Tribal Area) neibhah waroh toh ki thaw yong ki paidbah tre chnong. Da ong chooh chooh leh wa toh u pyllait ya ka jylla na ki aiñ wa da mynjur da ka Parliament wei u pdiang du ya kiwa wan lyngba u Lat ka jylla.
U Kharjahrin da ong u leh wa ki bru kiwa na kiwi ki jylla toh u thap Vote ki cha ki jylla yong ki hi chisien san snem khnang wym ktah ya ka hok ki tre jylla wow jied ya kiwa mihkhmat.
Discussion about this post