Shillong: Ka Passing Out Parade wa 46th Batch Basic Course Trainees ka North Eastern Police Academy (NEPA), da pynman yaka ynne ka sngi hei wan pait u montri rangbah ka jylla u Conrad K Sangma.
U Conrad K Sangma hei klam yong oo da yaroh u ya i lai luti e sikai ka NEPA ha kini ki 41 snem deiwa ong waka thaaiñ North East man ko kawa em hei thaw wa kyrpang yaka ri ym du hei spah ka rymaw, i dustur riti, i boon ki jaitbru waphær waphær wei man ko leh kawa pynyabi yaka ri lyngba i khyndaw wa khian iwa wanrah leh yei chitom wow poi thaw.
“I pynbiang yaki luti ki syngkeiñ wa kiwi ki kaam pynroi yaka thaaiñ North East man ko iwa emkaam bha wei i man i kiwa yaleh wow pynku yaka khayi pateiñ, u pynbiang ya ki sarok wa kiwi yow pynku yaka Meghalaya,” da ong u Conrad. Da ong u leh wa ka roi ka paar ye ko u wan du ha ki por wa em ka suk ka saiñ wei ini chong ko haki pulit wow yada na kiwon kiwon kiwa kwah wow pyndooh yaka suk ka saiñ yow yoh ki paidbah leh yaka chaniah. “Ki jylla wa em ka suk ka saiñ yarap ko yaka sorkar wow pynlut yei por yow wanrah yaka roi ka paar,” da ong u.
Da ong u leh wa ki pulit ka thaaiñ North East i kaam yong ki phær ki na kiwi ki jylla neidaw wa kiwa boon ki jylla ha kani ka thaaiñ em pood ki wa kiwi ki ri kamtæ hap yaleh ki leh ya kiwa chimkabu wow kaap chilliang pood kiwa yaleh wow lait naka kti yong ka aiñ, kamtæ da khut u ya ki pulit ka thaaiñ North East wow ya krehlang wa ki pulit ka wa yang khappood kam ka Assam Rifles, BSF, ITBP wa SSB.
U montri rangbah ha kani ka sngi da saam u leh ya ki khusnam kam ki Trophy wa ki Medal cha kiwa chah e sikai kiwa da leh bha.
Ha chwa ini, u Director, NEPA, u Kala Ramachandran da pynbaam smai u ya ki 196 ngut kiwa da pyndep yaka chah sikai. Ki 50 tayaw ka 46th Basic Course kynthup ko ya ki pulit wa na Meghalaya, Nagaland, Manipur, Mizoram wa Tripura.
Discussion about this post