Ka Party Jharkhand Mukti Morcha (JMM) ynne da mih ko wow chna sorkar ha Jharkhand heiwa u Hemant Soren daw baam smai u kam u Chief Minister ha kani ka 29 tarik.
U Hemant Soren, uwa man leh kam u Working President ka JMM da jied ya oo da kiwi leh ki Party kam wow yahkhmat yaka sorkar.
Uwa yahkhmat ka Congress Legislature Party (Elect) u Alamgir Alam da tyrwa u ya i pyrtuid u Soren wei da kyrchaan ya ini da uwa yahkhmat ka Rashtriya Janata Dal (RJD) u Tejaswi Yadav wa u Congress General Secretary wa pait yaka Jharkhand u RPN Singh.
U Hemant Soren deilang wa ki MLA kiwa jop naka JMM, Congress wa RJD da yachem ki wa ka Governor ka Draupadi Murmu ha Raj Bhawan yow pynyoo yei boon paaid yow chna sorkar wei da e leh yei pyrtuid ki MLA kiwa kyrchaan yow chna sorkar kiwa da em 50 ngut.
Kani toh ka sien wa ar wa u Hemant Soren u man u kam u Chief Minister. Ka sien nyngkong toh nadooh July 2013 hadooh December 2014. U pa u u Shibu Soren leh da dep man u kam u Chief Minister le sien.
Ka Jharkhand toh ka jylla wa pynmih napoh ka Bihar ha u snem 2000 hadien ki phaw snem wa yakhih ki yow yoh yaka jylla ya ki kam ki jaitbru ri-loom.
Hadien ini, kani ka jylla da yoh bait ko da u jaitbru ri-loom kam u Chief Minister, tangwa hadien ka Election 2014, ka BJP da jied ko ya u Raghubar Das uwa ymtoh u jaitbru ri-loom uwa na ki Other Backward Class (OBC) kam u Chief Minister.
Discussion about this post