Jowai: Ka seiñ Meghalaya People’s Labour Union (MPLU) da thoh ko cha u montri rangbah ka jylla u Conrad Sangma hajrong i thung ya u M.S. Rao IAS kam u Chief Secretary ka sorkar Meghalaya heithaw u jaitbru Khasi u Hector Marwein IAS.
Ka seiñ da pynsñiaw ko yei pyrchah joor ya ini i thung ya u MS Rao IAS kam u Chief Secretary deiwa ong wa uni u bru toh uwa man pyrchah yaki jaitbru ri-loom deiwa ong wa ya ini da yoo heipor wa mih ka kaam Village Administration Bill ka Khasi Hills Autonomous District Council (KHADC). Wei ha ka sien wa nyngkong wa yaka Bill ka KHADC namo kiwon kiwon ki Bill ki Autonomous District Councils da phah da u Lat ka jylla Meghalaya cha ka Union Home Ministry, New Delhi. Wei ini toh i wym jooh sñiaw iwa da tyngkheiñ ya i hok wa da e daka riti synchaar ya i.
Ka MPLU da ong ko wa kam u sahep sorkar uwa da heh kyrdan ha itu i por, u Rao da yoh laad u wow yada ya i hok ki jaitbru ri-loom iwa u Rao da jied u wym leh. Chooh chooh da ong wa ym bien u wow tip wow sñiawthooh chaphang i yongrim ka jaitbru yong i, i rukom im, i hok wa i em kyrpang yong i hopoh ka Constitution ka ri India. Kattu deiwa booh ya oo ha khlieh dooh ki sahep hapoh ka sorkar kam ha ini i por wa em i yakhih pyrchah yaka Citizenship Amendment Act 2019 (CAA), i dawa pynkrehkaam yaka Inner Line Permit (ILP) hapoh Meghalaya kamjooh i pynkylla (Amendment) yaka Sixth Schedule hapoh ka Constitution ka ri India, ka seiñ da khuslai ko yaka mynried ki jaitbru ri-loom ka Meghalaya.
Neiliang u President ka seiñ u Erwin K. Syiem Sutnga uwa man leh kam uwi na kiwa soipyrtuid haka dorkhat wow pyrchah yaka CAB kawa e cha u montri ka kaam pohyung ka sorkar pyrdi u Amit Shah da ong u wa katni em boon i pyrchah da kiwa boon ki sorkar jylla waka sorkar India hajrong ka CAA, ka National Register of Citizens, 2019 wei i rai ka sorkar Meghalaya wow dawa pynkreh (ILP) wei wow rah ya ki kaam pynkylla yaka Sixth Schedule cha ka Parliamentary Standing Committee ka Home Affairs, New Delhi, ym sñiaw skem u wa u Rao daw noh u cha ka liang wow yada ya iwa emkaam ki paidbah ka Meghalaya wei ini daw wanrah ko leh ya u moochynthut yaka synchaar khadar hapoh ka sorkar jylla.
Kamtæ ka Meghalaya People’s Labour Union da dawa ko wow pyndam noh ya ka hukum wow thung ya u Rao wei wow thung da u Hector Marwein IAS katkam wa toh i hok yong oo kam u sahep sorkar uwa rap heh kyrdan hei chakri yaka sorkar wei lada ym leh ya ini, ka MPLU daw pynman ko yaka yakhih.
Discussion about this post