Jowai: Ka Seiñ Kyntu Seiñ Raij- 12 Daloi da pynman ko yaka yalang kynmoo warom ya ka lyngkhooh sngi yap wa 157 u Khawait ka Ri Jaiñtia u Woh Kiang Nangbah ha kti ka sorkar phareng ha u tylle pasi ha ka 30-12-1862. Ya kani ka lehwarom da pynman ha yung krehkaam yong ka ha Thadmuthlong C Phramer, West Jaiñtia Hills District, heiwa da wan lang ki khon yong ka Seiñ Raij Muthlong wa kiwa kitkaam ki dkhot na ki chnat waphær waphær ki Seiñ Raij ha ka Biar Seiñ Raij Muthlong.
U President ka Seiñ Kyntu Seiñ Raij -12 Daloi u waheh Wom Chyrmang da pynlai u yaka yalang wei da sdang da i lai booh ya u syntu ha i dur u Woh Kiang Nangbah ha pchem ka yung krehkaam ka SKSR -12 Daloi da u waheh Meliyo Lyngdoh uwa man leh u President ka Seiñ Raij Muthlong wei da pynbood won sa i pynhær ya ka lama ka Seiñ da u Dr. GL Niang uwa man leh u Ex-President ka Seiñ Kyntu Seiñ Raij – 12 Daloi.
Ya i klam chaphang i im u Woh Kiang Nangbah kam uwa yahkhmat wow yaleh pyrchah wa ka sorkar phareng da yoh na u waheh Barding Sari na ka Seiñ Raij Mukhla.
Da pynphooh yaka kani ka sngi da ki chaad tynre kam ka chaad Pastieh na ka Seiñ Raij Nangbah wa ka Chaad Kyllaiñ Wait na ka Seiñ Raij Mukhla, kamjooh kiwi ki chaad tynre na ki khon ki hajar ka Seiñ Raij Muthlong na ki kyntoit dong waphær waphær, da yoh leh ki chaad na ki khon khynroo khyllood ka Seiñ Raij Shangpung Khliehmuchut Moolibang wei kamjooh leh na ki manbei ka chnong Phramer wa na kiwi kiwi ki Seiñ Raij.
Ha kani ka sngi ka Seiñ Kyntu Seiñ Raij – 12 Daloi da pyman ko leh yaka yakob siat khnam pyllah ha pchem ka yung krehkaam ka Seiñ Kyntu Seiñ Raij – 12 Daloi wei da yoh nyngkong u Langmet Phawa na ka Seiñ Raij Chnong Sabahmuswang Raij Tuber, wa ar da yoh u Klin Shylla na ka Seiñ Raij Chnong Mihmyntdu Raij Tuber katwa wa le da yoh u Barket Tang na ka Seiñ Raij Muthlong. Da pynman leh yaka yakob Extempore Speech da ka KKC ka SKSR -12 Daloi ha ka miet 29 tarik ha ka yung krehkaam yong ka wei da jop da u Kathauni Ymbon uwa yoh nyngkong naka Seiñ Raij Muthlong, wa ar u Ruhi Lamare na ka Seiñ Raij Shangpung katwa yei wa le da yoh u Trehikular Suchiang na ka Seiñ Raij Muthlong.
Discussion about this post