Jowai: Arngut kiwa chi kur da chah dat chah bom ki ha kiwa suba toh ki nong Bangladesh ynnin i miet ka 4 tarik ha neiñ ka Lad Darrang.
Ki arngut wa tip kam u R. Khonglah wa u T. Khonglah heipor wa dang wan li booh bru ki na Dawki ya kiwa wan bia wa man hayung ki ha chnong Lamin, manda poi ki ha hajan Lad Darrang da em wa khang yaka sarok da ki moo wei da wan kiwa rah da ki wait kiwa da dat tympiah yaka kari wei da sai ki yaki arngut wa em napoh kari wei da choh da bom ya ki da ka wait hadooh wa da jan dooh yei mynsien ki.
Ka khubor wa da yoh lum da ong wa ki arngut da pyntip ki wa em kamwa 8-9 ngut ki bru wa klam da i ktien Banlga wei da kdoh ki yaki kti yong ki wei da taan yaki na khap bri kwai yow rah yaki cha Bangladesh. Ha ini i por da em ki paidbah wa de ye u boodien ya kiwa chah rah deiwa bood yei snam wa joo cha luti wei manda jan chem yaki da ieh kiwa rahbor ya kini ki arngut.
Da pynkit wut wut ya kiwa mynsoo cha Dawki PHC yow yoh yei sumaar wei da phah kit ya uwi cha Shillong uwa da mynsoo joor.
Da suba leh wa ye u em palat ya 8-9 ngut ki bru neibhah heipor wa wan nyngkong kawi ka kari wow lai thooh ya kini ki bru na ini i thaw wa jia da chah kawang moo ki.
Neiliang u President ka JSU Shillong Circle u Treiborlang R Suchen, uwa man leh u tre chnong ka thaaiñ Dawki da ong u wa ini ym toh i sien wa nyngkong wa jia ini wei ym tip na iyi i daw wa da leh kamni, heiwa u ong wa da leh yow tooh yow lute leh ym em yoo toh.
Da kyntu u leh ya ki pulit kamjooh ya ki BSF wow pynjoor yei sonteri ya ki luti ki syngkieñ khamtam ha kini ki por.
Discussion about this post