Shillong: U Lat ka jylla, u RN Ravi ha kini ki ar sngi da yachem u ya ki heh niam ka jylla wa kynthup nadooh ki heh Balang, ki heh ka Seiñraij, Seiñkhasi wa ka Synjuk ki Nongsynshar Shnong ka Bri u Hynñiewtrep (SNSBH) heiwa da pynsñiaw u yei chaniah ha i rukom krehkaam ki dorbar chnong.
Ha ini i yachem da yaklam hajrong ki phang wa yatoh wa ka jylla, i chongsuk chongsaiñ, wa ki kaam pynroi.
Neiliang u Ravi da pynsñiaw u leh yei angnood wow kreh wow wanrah yeiwa thmu wa angnood kini ki waheh wei kyrmen u leh wow pteiñ ki wow kreh neibynta i bha i miat ka jylla liang wanang.
Heijooh i por da kyrmen u leh wow yachem wa kiwa yahkhmat yong ki seiñbhalang, kiwa seiñ khih seiñ kreh yong ki hi wa kiwi kiwi.
Hawa klam hadien i yachem neiliang u General Secretary ka SNSBH, u RL Blah da ong u wa i yachem man i iwa jop neibhah wa u Lat da pynsñiaw ym du i chaniah ya ki dorbar chnong tangwa da tyrwa yarap u leh ya ki.
Da ong u leh wa i yachem neidaw wa man i iwa jhan neiliang ka synjuk leh ym em u pynbiang ko ya ki kot ki sla namo ki mat wow yaklam tangwa da kular u leh wow yachem biang wa ki hadien wa wan biang u na Nagaland.
U Blah da ong u leh wa ha i yachem wa daw man biang, ka synjuk daw pynkynmoo biang ko wow pynim ya ka Village Administration Bill (VAB), wa ya i toor pood ka Meghalaya Urban Development Authority (MUDA).
U heh ka synjuk da ong u leh wa u Lat da klam che u wa i rukom ksoh khyndaw da man ko kawa emkaam bha neibynta ki ri-loom, wei da ong u leh wa ha i yachem wa daw man biang daw man i iwa jop khamtam wa yatoh wa i bha i miat ka jylla.
Discussion about this post