Mynsoo uwi u damok na Bangladesh hadien wa chah siat u ha Amdoh

Jowai: Ynne ka sngi hadien wa mih i awri ha khappood wa ka ri Bangladesh heiwa ki damok da pynmynsoo ki ya uwi ha Amdoh wa ya ki chipai BSF, neiliang ki heh chipai BSF wa Border Guards Bangladesh (BGB) da pynman ki ya ka Flag Meeting ha Rongtilla hajan Dawki heiwa ya ka BSF da yahkhmat da u Commandant ka 30 BSF Battalion, u Dinesh Singh katwa ya ka BGB da mihkhmat da u 48 BGB Commandant, u Lt. Col. Jamil.

Ka BGB da kular ko wow yarap ya ka BSF wo kem ya kini ki damok wei ha i janmiet da yohkem noh ha ki na Bangladesh.  

Ki heh ka BSF da ong wa ki chipai heipor kamwa 12:30 i synyaw arngut ki chipai da yaleh ki wow beh ya ki damok na iwi i khloo hajan Rongtilla heiwa kini ki damok da pymynsoo ki ya uwi u chipai da ka wait. 

Hadien ini kini ki damok da lai ki cha Amdoh heiwa uwi u tre chnong, u Pratap Bareh da siat u chi kuli da ka suloi chwa wow knieh ki ya ka suloi na oo wei wow lute ya oo. 

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ha ini i jia uwi na ki damok da mynsoo u wei da kem ya oo na kawi ka Hospital da ki chipai BGB. 

Ka suloi wa da knieh na uni u tre chnong da chem ya ka najan khappood hadien wa ieh noh ya ka chadien da kini ki damok.         

Ka yutip na ki tre chnong leh da kam ki wa uwi na ki damok da mynsoo u hadien wa siat u Pratap ya ki chi kuli.

Neiliang ki tre chnong da pynsakhiat ki yeini i mynsoo uwi na ki damok toh na i snaam wa joo ha i thaw wa jia ini i chah siat hapoh ka chnong Amdoh.