Jowai: Yow kyntu kynrong yei sap ki khynroo khyllood, ka National Service Scheme (NSS Unit) yong ka Thomas Jones Synod College Jowai, ynne ka sngi da pynman ko ya ka program e sikai hajrong ka “Leadership and Personality Development Through Skill” wada chimbynta da ki dkhot ka NSS Unit yong ki 5 tylli ki College ka Ri-loom Jaiñtia wa kynthup ya ka Thomas Jones Synod College, Jowai; ka Nongtalang College; Kiang Nangbah Govt College, Jowai; ka Jaiñtia Eastern College, Khliehriat wa ka St. Anthony’s College Extention Byndihati.
Ka Dr. D. Nongkynrih, Programme Co-ordinator NSS Cell NEHU Shillong hawa e yei klam da ong ko waroh da tiplang wa ha ka pateiñ katni ki khynroo khyllood im ki hapyrdi boon i eh wa haap ki u yakhun, tangwa heijooh i por ki laad ki luti leh boon ki.
Da ong ko wa ka NSS toh ka Service Scheme wa da pynmih daka sorkar pyrdi wei ym mut du kat u e donhi i chakri ya ka ri ha kiwa boon ki liang, tangwa yow kyntu kynrong leh kammon u man ki khynroo kyllood kiwa tyrchaaiñ ka mynried mankawi wei u man leh kam kitæ kiwa yahkhmat.
“Nadooh uni u snem da yooluti kamwa 64% na ki khynroo khyllood hapoh ka ri u em bynta ki, wei i por da emkaam bha wow yoh ya kiwa yahkhmat wa thymme heiwon iwon i rta wow wan ki chakhmat,” da pynrap ka Dr. Nongkynrih.
Neitæ da ong leh wa kam kani ka programme yarap ko wow wanrah i kylla hei yatoh wei roi i paar, neitæ ym du wa emkaam u ku haka mynried, tangwa pynmyntoi ko ha kiwa boon ki liang.
U kongsan ha kani ka sngi, u Deputy Commissioner ka WJHD u Garod LNS Dyke da pynkynmoo u ya ki NSS hajrong le jait i rukom man ki bru ha ka juk wa katni. Iwa nyngkong toh ki “Depth Idiot”, kini ki bru kiwa biang i stat i tip tangwa ym burom won ki yei hok kiwi, man ki kiwa khapnap wei ymtoh kiwa nehswe u kitkhlieh. Wa ar da khut ya ki kam ki “Tribal People”, kini em ki yei bor pyrkhat Tribal, i pyrkhat wym kwah u lai chakhmat katwa kiwa kiwa le won da khut ya ki kam ki “Civilized People”, kini won 100 chah pyrchah i man ki na ki Idiot, man ki kiwa tip yei hok yong ki hi wei kamjooh kiwa burom yei hok kiwi.
Kamtæ da yooluti u wa lada pyrchang ki katkam ka rukom im namo ka Court of Conduct yong ki NSS Volunteer daw man sakhiat ki kam kitæ ki Civilized People wei kyrmen u wow wanrah ki ya ka mynried wa tyrchaaiñ ya ka jylla waka ri waroh kawi.
Kiwi won wa klam kynthup ki ya u Dr. R.R. Kharkongor, Principal Thomas Jones College; u Wandy. E.H. Lamin, Programme Officer NSS Unit, Thomas Jones College wei ya ka yalang da pynlai da u Dr. Dakyntuhimi Lyngdoh, Programme Officer NSS Unit Thomas Jones College.
Discussion about this post