Ka sorkar Germany da angnood ko wow khang noh ya waroh ki karkhana pynmih bordiñ wa pynemkaam da u mooyong chwa u snem 2035 wei em na kini ki karkhana u khang noh ki nadooh uni u snem.
Da ini i thmu ka sorkar ka Chancellor Angela Merkel chirup wa ki jylla wa pynmih mooyong da pyrkhat ki kammon wow leh wow poi ha kani ka thong.
Katkam wa man katni kamwa 20,000 ngut ki bru kreh ki ha kini ki karkhana wei na kini kamwa 15,000 ngut toh kiwa kreh ha i tih mooyong wei 5,000 ngut won ha ki karkhana wa pynmih hiwot ya ka bordiñ.
Ka sorkar da angnood ko wow khang noh ya kini ki karkhana kam ha jylla North Rhine-Westphalia, Saxony, Saxony-Anhalt wa Brandenburg deiwa su salan ya ki da ka poisa wa kynjoh da ki phaw Billion Dollar.
Katkam ka thong yong ka sorkar Germany da kwah ko wow dam noh u pynemkaam mooyong chwa u 2035.
Ki karkhana u yoh ki €4.35 Billion ($4.85 Billion) kam ka bai lutsan namo ka Compensation kam chibynta wow khang noh ya u mooyong heiwa 4 tylli ki karkhana u sangeh krehkaam noh ki ha uni u snem.
Ka sorkar u e ko €14 Billion cha ki jylla wa chah ktah wei kamwa €26 Billion kam ka poisa wow kyrchaan ya ki ha ki kaam wow leh ki chaphrang neibynta ki paidbah khamtam ki wow dooh kreh noh na ini.
Discussion about this post