Jowai: Ha kani ka Khyllaw 18 tarik uni u bnai ka Dorbar Chnong Loomkyrwiang, chynrang wa kynthai khynnah wa waheh da mih ki wow chimbynta chongchit ka-it mynsien hei chaad sarok kawa man kam chibynta wow pynyoo pyrthai yei lehkmen lehwarom yei lai luti wa 100 snem ka Yungwalieh ka chnong.
Kam ka khana parom wa tbian, ka Loomkyrwiang toh kawi na ki dong warim ha Jowai kawa yoh ya i bhah i bynta wa kyrpang hapoh ka Raij ka chnong nadooh ki por nachwa.
Ha uni u snem hei pait i pynlai ka Dorbar Chnong da pynman yei lehkmen lehwarom iwa da sdang nadooh ka sngi Pynsiñ 11 tarik uni u bnai wei u pynkut ha ka Muchai 15 Thohlakhmi (Feb) 2020.
Ha kani ka sngi yeini i chaad sarok da sdang na Loomkyrwiang tymbud ka Jowai kam na Loompyrdi Iongpiah, Loomiongkjam, Panaliar, Dulong, Mission Compound, Chutwakhu, Khimmusniang, Umchaiar wa Chiliangraij.
Sakhi ya kani ka chaad sarok da chem wa ki khon ka Loomkyrwiang nadooh ki khynnah hadooh ki waheh dei mynsien wa kmen wa ka-it chimbynta chongchit ki wow chaad kynthih hei sur wa rwai ya ki kyntien Makhane yei Burom u Trekirot wei burom ka pateiñ wa da lai kawa da yah da tyoor luti hei wow seiñ u dang yow loom u pdeiñ, ka dong ka chnat wa yei Yungwalieh kawa man ka Yung ka thaw wow yoh u yaklam yaphyllu yumut yei kaam yonglang yong ki wei wow pynskem pynskit ya ka niam ka ruom, ka dustur katkam wa pynjooh wa sikai na warim.
Discussion about this post