Nadooh myntu ka miet daw pyndooh bordiñ noh 2 kynta chi sngi: Conrad

Shillong: U Montri Rangbah ka Meghalaya, u Conrad K Sangma da pyntip u wa ka sorkar ye ko wow pynduna noh ya i por pyndooh bordiñ (Load Shedding) hadien wa da yoh yaklam wa ki Company wa da dep e kylliang.

Hawa klam wa ki laad pathai khubor u Conrad da pyntip u wa i pyndooh bordiñ daw man noh ko ar kynta ha ka chi sngi heipor miet ka wow sdang nadooh myntu i miet, katwa ya i por wow pyndooh daw pyntip da ka Meghalaya Energy Corporation Ltd (MeECL).

U Conrad u da pyntip u leh wa ka sorkar da yaklam ko khlem sangeh wa kitu ki Company kiwa ka jylla Meghalaya da e kylliang ya ka bordiñ wei ini i pynduna ya i pyndooh bordiñ toh hadien wa mihsoh i yaklam kawa ye u wanrah ya ki laad wow yoh biang kamwa 40MW lyngba ka Letter of Credit (LC).

Kam wow pynkynmoo wa ha ka tayaw wa da dep, u Montri Rangbah da pyntip u wa iwi na i daw wa duna bordiñ ha ka jylla toh wa neidaw wa em ki kattu katni ki Company wa ka jylla da e kylliang ya ka bordiñ ha i por wa pahooh, wei kawi na kini toh ka National Thermal Power Corporation (NTPC), tangwa kini ki Company ym ye de ki wow e bordiñ cha ka jylla neibhah wa da pynkylla noh ka sorkar India ya ki kyndon wow pynlang bordiñ wow su daka poisa ym toh wow e kylliang ya i bordiñ.

Related posts

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

Hawa kylli, u Myntri Rangbah da pyntip u wa i emkaam bordiñ ha ka jylla man ko kamwa 600MW, katwa ka jylla ye ko wow pynmih du kamwa 300MW na ki ar tylli ki Project, kitæ na Umiam wa Leshka, kawa pynyoo wa i duna man ko mar chiteiñ, tangwa da pynrap u wa da pyrchang wow pyndap da i yarap yong ki thaw pynmih bordiñ kiwa em ha ka thaaiñ mihsngi.

Ha iwi ka liang u Conrad K Sangma da pyntip u wa i wym su ki paidbah ya ka bai bordiñ cha ka Meghalaya Energy Corporation Ltd (MeECL) da poi ko cha ka T.181 Klur.

Da pyntip u leh wa na pyrdi kini kiwa ym em su yaka bai bordiñ kynthup ya ki karkhana heh kiwa pynemkaam ya ki Industrial High Tension ka ram wa toh u su ki da poi ko palat T.52 Klur, kiwa pynemkaam da ki paidbah næ ki Domestic Low Tension, ka ram wa toh u su man ko T.40.1 Klur, ki thaw krehkaam næ ki Commercial Low Tension, ka ram wa toh u su da man ko kamwa T.21 klur wei kamjooh em leh kiwi ki thaw wa toh u su cha ka MeECL.

Ha i jooh i por, u Conrad da kyntu u ya waroh wow ya krehlang deiwa su ryntih ya ka bai bordiñ khnang wow lait na i eh i duna bordiñ.