Shillong: Ka Bhutan da jop ko yaka Meghalaya da 3-0 haka yalehke U-17 Girls FIFA Friendly, wa pynman da ka Meghalaya Football Association deilang waka Directorate of Sports & Youth Affairs, ha JN Stadium, Shillong ynne i janmiet.
Ka Captain ka Bhutan ka Sonam Choden da thap ko yaka kool wa nyngkong da i chut Free-kick kawa chim ko na lait ka Penalty Arc wei kani ka kool da neh ko hadooh wa kut ka kylla step.
Ha ka kylla miet won, ka Sonam Lhamo da thap ko yaka kool wa ar da ka bool wa wan naka chut Corner yow pynlai ka chapoh kool katwa ka Choden da thap ko sa chi kool ha chwa wow kut ka yalehke.
Ki kynthai ka Meghalaya da yoh ki kattu katni ki laad wow thap kool khamtam ka Sunalinda Iawren kawa da yoh yei kyrchaan wa biang naka Fragrancy Riwan, Darisha Kharlyngdoh waka Wandashisha Marwein.
Ya kani ka yalehke da wan sakhi da ka Sports & Youth Affairs Director ka Wanri Booth, kam ka kongsan.
Kani man ko ka nyngkong ka yalehke wow pynman ha Shillong heiwa ka wa ar daw pynman hapyrdi kini ki ar liang haka 23 tarik uni u bnai ha JN Stadium heipor 2 waje i sngi.
Discussion about this post