Shillong: Deiwa sah sa 6 sngi chwa wow sdang ka Hero Junior National Football Championship (Tier 1) kam chibynta ka Dr. BC Roy Trophy ha Shillong, ka Organising Committee wa da chna da ka Meghalaya Football Association (MFA) da lai bait i pynkhreh yow pynman ya kani ka lympung kawa jop.
Hawa yaklam wa ki laad pathai khubor ynne ka sngi ha Shillong Press Club, u Organising Committee Secretary, u Sunesh Syiem da ong u wa ya kani Organising Committee da thung ki dkhot wa tip bniah chaphang ka yalehke Football wei da pynkhreh wow pynman ya kani ka lympung katkam ki kyndon waka mang poisa wa da booh daka All India Football Federation.
Heiyatoh won yeiwa jied yaka Meghalaya wow pynman ya kani ka lympung yalehbol, u Advisor ka MFA, u Arki Nongrum da pyntip u wa ka Association hap ko wow ya thong neibynta ini wei manda sñiawhun ka AIFF ya ini, da jied yaka Meghalaya wei da e cha ka MFA neibynta u 2019-20.
Da pyntip u leh wa kiwa yalehke ka Meghalaya da pynjoor bha ki yei pynkhreh ha kini ki tayaw wa da dep. Heiwa u Syiem uwa man leh u Chairman ka Youth Development Cell, da ong u wa da jied ya ka liang Sub-Junior kawa jop ini wa dep yaka Sub-Junior National Football Championship deiwa pynman leh yei jied kawa em le bynta ha kylleiñ ka jylla wa kyntup ya ki District Association, ki Clubs wa ki Academy chwa wow jied khaddooh ya kiwa yalehke.
Da yooluti u leh wa daw ye ka Meghalaya wow leh bha hanlada ym em ka liang kswa jem haka kyrdan Tier 1.
Waroh 27 tylli ki yalehke daw pynman ha Mandan Polo Ground. Ki 16 tylli ki liang da yabhah ya ki ha ki soo tylli ki Group, wei daw em soo tylli ki yalehle Group chi sngi ka wow sdang nadooh ka 28 tarik. Ki liang wa khlieh ya ki jar jiar ki Group yong ki daw yoh ki wow psiah cha ka Semifinal. Ki Semifinal daw pynman ya ki haka 3 wa 4 tarik u Thohlakhmi (February), katwa ka Final u pynman haka 6 tarik u jooh u bnai.
Ka Meghalaya da emlang ko waka Haryana, Odisha waka Sports Authority of India haka Group C. Ka Mizoram kawa man kam ka Defending Champions da em ko haka Group A. Sa kawi ka jylla na thaaiñ mihsngi wa yoh u chimbynta toh ka Manipur kawa em ha Group B. Ka Meghalaya daw yachem ko waka Haryana haka sngi sdang.
Ka Dr. BC Roy Trophy em ko ar kyrdan, heiwa ki liang wa yoh nyngkong wa kawa yoh wa ar haka Tier 2 da pynku kyrdan ya ki cha ka Tier 1, katwa ki ar liang wa em ha tre dooh da chah pynhiar ki cha ka Tier 2.
Caption: (From left) Tournament Committee Member Cliff Nongrum, Organising Committee Secretary Sunesh Syiem, MFA Advisor Arki Nongrum.
Discussion about this post