Jowai: Iwa ye u man ka sien kawa nyngkong ha i parom yong ka jylla wa daw em ka rong næ ka tamasa kawa kyrpang du neibynta u khoo. U khoo uwa man sakhiat u jait thung uwa kongsan tam yong ki bru haka jylla, tangwa ym jooh em iwon iwon i leh kyrpang neibynta uni u baam wa kongsan.
Ha kani ka 25 tarik, ka Society for Urban and Rural Empowerment (SURE) deiwa ya krehlang waka North East Slowfood and Agrobiodiversity Soceity (NESFAS), Shillong ya kawa da kyrchaan leh da ka REC, daw pynman ya ka Rice Festival haka chnong Mukhap kawa em hapoh ka Laskein Development Block, West Jaiñtia Hills District. Kani ka tamsa daw sdang nadooh i por 10 waje i step.
Ha kani ka tamasa kawa chisngi daw em boon ki prokram kiwa kynthup ya ka pynyoo rong ya ki symbe tynre ya kiwa daw wanrah da ki warep kiwa em ha kani ka thaaiñ wei kamjooh leh kiwa na kiwi ki thaaiñ. Ka thong toh wow pynkhai im wei wow ksoh symbe biang ya ki symbe tynre kiwa da jan dooh jait. Kawi won ka prokram toh wa hadien yong i pynyoo naam ya ki symbe, ki warep daw ya kylliang symbe ki para ki (Seed Exchange Program). Daw em leh i pynyoo ya ki rukom sumaar ya ki mar thung kiwa leh da ki warep hi da iwa pynemkaam da ka yutip tynre wa ka sap kawa em ki.
Kawi won ka bynta ha kani ka tamasa toh wa daw em leh ka yakob phawer ki wow man hajrong ka phang kawa yathoh wa ki baam tynre. Daw em leh ya dai ya thied ya ki baam tynre kiwa daw pynkhreh da ki kynhun kiwa em ha kini ki thaaiñ. Kamjooh leh daw em ka yaw ki warep hei wow dai ya ki maar rep kiwa thung khlem pynemkaam dawai.
Kawa kongsan ha kani ka sngi toh ka tamasa rwai heiwa ka Moreal Paswet kawa rwai kawa pawnaam yong kani ka jylla kawa da rwai leh ka phlim Ïewduh kawa daw pynsñiawbha ya kiwa wan cha kani ka Rice Festival.
Ha i phah khubor u H.H. Mohrmen da khut da wer u ya ki paralok wow wan e mynsien ya ki warep ki yong i.
Discussion about this post