Ka chnong Lumshyrmit, kawi na ki chnong wa miat ha East Jaiñtia Hills District kawa em chiboon ki thaw lai ke ha ki bynta yong ka wah Myntdu kam ka Kchaaid Latang, Kchaaid Khlieh Latang, Thwai Thlen wa ki synrang wa mait dur wow lai pait ke. Ynne ka 24 tarik da wai ko ya ki thaw uiñke suwari da u Kyrmen Shylla, MLA Khliehriat Constituency uwa man leh u Minister ka Social Welfare, ha ka yalang wa tip kam ka Philanthropic Environment Friendly Programme wa pynman da ka chnong Lumshyrmit hei ya krehlang wa ka Lumshyrmit IVCS.
U Kyrmen Shylla hawa e yei klam yong oo, da e khublei u ya ka chnong Lumshyrmit wa da ye ko wow pynmankaam ya i thmu yong ka neibynta wow pynku yaka kaam uiñke suwari. Da yaroh u leh ya u Dr. P. Nongtdu, Principal ka Jaintia Easteren College wa ya ki khynnah puræ yong ka kiwa man kiwa yah luti wa nyngkong wow pyntipmit cha ka pyrthai ya ki thaw uiñke yong ka chnong Lumshyrmit.
Chooh chooh da ong u wa man kawa emkaam bha wow yoh ki sikai neibynta ka kaam uiñke suwari wei daw thooh laad u wow e yarap ya ki khynnah khynroo yong ka chnong kiwa kwah wow pynbniah ha ki bynta ki kaam waphær waphær. Ha i jooh i por da ong u wa daw thooh ki laad ki luti neibynta wow kyntu chooh chooh ya ka kaam uiñke suwari ha ka chnong Lumshyrmit wei kyntu u leh ya kiwa chong chnong wow pdiang ya kiwa wan ke da i maya deiwa man kiwa em akor em burom.
Kiwi kiwi de ki kynrem ki lyndan wa ki bru pawkhmat wa ya emlang ha ka sngi wai kynthup ki ya u Lasky Rymbai, MDC Tuber, u Finelyness Bareh, MDC Rymbai, Dr. P Nongtdu, Principal Jaintia Eastern College, u Fr. George Lyngkhoi, Principal St. Anthonys College Byndihati, u Ki Dkhar President San Shnong, u Tyrnit Pdein Secretary San Shnong, u Rilling Rasmut Waheh Chnong Lumshyrmit, u Kiyo Dkhar Secretary Chnong Lumshyrmit, u Helping Phawa, Waheh Chnong Mutong, u Hundred Phawa, Waheh Chnong Mukhaialong, u Mutlang Dkhar Waheh Chnong Wapung Skur wa kiwi kiwi.
Kani ka chnong em ko marjan wa ka chnong Cham Cham kawa em ka Kchaaid Rynji wa ka Thwai Sahksaw, ka chnong Mutong kawa em ka Kchaaid Moopun. Wei jngai ko kamwa 28.6 Km na Khliehriat, 34.6 Km na Jowai wa 15 Km na Kongong na u sarok bah NH 6.
Discussion about this post