Ka yung krehkaam u Deputy Commissioner, West Jaiñtia Hills District, Jowai deiwa ya krehlang wa u District Sports Officer, West Jaiñtia Hills, Jowai da pynman ki yaka 10th National Voter’s Day Run 2020 neibynta ki chynrang wa kynthai (Open Category) ynne ka 25 tarik heipor 6:30 i step.
Waroh kiwa chimbynta da poi ki palat 140 ngut ki chynrang wa kynthai wei ya kani ka yakob phet pyllah da wan kaweh lama da ka R.S. Manners ka ADC ka WJHD hei emlang u SP wa u Addnl. SP ka WJHD.
Ka yaphet da sdang yaka nadooh na Main Gate ka Kiang Nangbah Stadium neitæ da lai na Ladthadlaboh Main Road-Kiang Nangbah College-Bypass-Myntdu Bridge-Amlarem Bypass-Stand War-DC Office-New Hill-National Highway-Kiang Nangbah Indoor Stadium (i wa man kam i thaw pynkut).
Ha iwa kut, neiliang ki chynrang da poi nyngkong u Marso Kyndait, wa ar u Dasaman Kyndait wa le u Belin Dkhar kiwa waroh le naka chnong Sabahmuswang.
Ha ki kynthai won da yoh nyngkong ka Happiness Phawa (Sabahmuswang), wa ar ka Damon Kyndait (Myrjai) wa le ka Medaroi Biam (Raliang).
Kiwa yoh nyngkong da yoh ki yaka song poisa wa T. 5000, wa ar T. 3000 katwa kiwa yoh wa le won yoh ki T. 2000.
Discussion about this post