Jowai: Chibynta wow kynmoo warom yaka lyngkhooh sngikha wa 200 yong ka Florence Nightingale kawa man kawa yahluti wow pynthymme ya i rukom krehkaam ki Nurse wow chakri yaki paidbah ha i kjut i chitom, neiliang ka Trained Nurses Association of India, West Jaiñtia Hills Unit leh ynnin ka 25 tarik da chim ki yaka bynta wow kynmoo warom ya kani ka sngi ha Dr. Norman Tunnel Hospital, Jowai haka yalang wa pynlai daka Rimidian Suting, President Trained Nurses Association of India, West Jaiñtia Hill Unit.
Ha kani ka kynmoo warom da ya ksohkti leh wa ka pyrthai waroh kawi neibynta wow kyntu yaka chait ka khiah, wow bood yaka nongmuna ka Florence Nightingale, wei u snem 2020 da chim kam u snem yong ki Nurse wa kiwa yarap wow pynkha khonbo (Year of the Nurse and Midwife).
Ka Principal yong ka School of Nursing Dr. Norman Tunnel Hospital, ka B. Tang hawa e yei klam da ong ko wa haki le snem yong ka Campaign ki Nurse nadooh u 2018-2020 (Three Year Global Campaign) da pynlai bait lai ryntih deiwa ya krehlang ka World Health Organisation (WHO) wa ka International Council of Nurses (ICN) hajrong ka yurim wow kyntu yaka chait ka khiah wow rah yaka naam ka burom ki Nurse.
Nalor wa pynche yaka bynta wa kongsan yong kani ka Campaign, da ong leh wa ka thong wa da kyrmen u jop hapoh u snem 2020 toh wow pynkhlan ya i bor i lah ki Nurse, i stat i chemphang yow pynkhlan ya i chakri neibynta wow pyntikna wa ha waroh ki thaw sumaar u nangpynboon ya kiwa chah sikai haka kaam Nurse wa kiwi kiwi.
Ha kani ka kynmoo warom ki Nurse, da chimbynta wow thang mombati wa da yahkhmat da ka C. Lathong Nursing Superintendent Jowai Civil Hospital Ialong, wei da skit langdong ka pchem ka Hospital.
Discussion about this post