Ka Khasi Students Union Jaiñtia Hills District lyngba ka chnat krehkaam yong ka, ka KSU Narpuh Circle dadep thoh ko cha u Member Secretary ka Meghalaya State Pollution Control Board (MSPCB) wow pynsñiaw yei pyrchah hajrong i thmu biang sa chisien ka Board wow pynman ya i pynsñiaw paidbah næ ka Public Hearing ha Brichyrnot neibynta wow pynheh ya ka paar tih moochuni ka Star Cement Co. Ltd.
Kani ka karkhana kwah ko wow yohbor u tih ya u moochuni na ka paar kawa heh hadooh 42.051 Hectare kawa haap hapoh ka Eco Sensitive Zone iwa man pyrchah ya ka aiñ wow yada ya ka Rymaw.
Kam wow pynkynmoo wa ka seiñ hi dadep ko u chimbynta wow pyrchah wei wow pyndam ya ka jooh ka Public Hearing ka wa da thmu u pynman ha ka 19-10-19, heiwa da hap noh u pyndam ya ka neidaw i pyrchah wa joor yong ki seiñbhalang, ki chnong wa kiwi kiwi.
Ka seiñ da phylla ko wa kammon ka MSPCB dang elaad biang ko ya kani ka karkhana wow pynman ya kani ka pynsñiaw paidbah ha kani ka 30-01-2020 sa chisien heijooh i thaw.
Neiliang ka seiñ da ong ko wa ini pynyoo i wa em iyi iyi cha lyndet wei man i leh wow yoohbeiñ yei mon yong kiwa boon walang.
Ka seiñ da pynrap ko wa ymjooh pyrchah ko ya iwon iwon i kreh kaam pynroi tangwa ymtoh u wan i deiwa ktah ya ka rymaw.
Kamtæ ka seiñ sa chisien yieñ biang ko wow pyrchah ya ini i thmu kani ka karkhana wow pynman ya kani ka Public Hearing.
Discussion about this post