Jowai: U montri wa pait yaka chnat Printing & Stationery, Revenue & Disaster Management, Social Welfare ka sorkar jylla u Kyrmen Shylla, ynne ka sngi da lai sylli u yaka yung krehkaam ka chnat Printing & Stationery ha Jowai deiwa emlang u Deputy Commissioner ka West Jaiñtia Hills District u Garod LNS Dykes, ki sahep sorkar wa kiwi kiwi.
Katai ka yung krehkaam em ko hadien ka yung krehkaam u DC ka WJHD hi wei ym pu em ko i thaw wa pura nalor wa ka thaw wa krehkaam ko katni ym em man ko kawa biang.
Hawa yaklam wa u montri, da ong u wa ka thaw man ko kawa khynnia bha wei hadooh ki wakreh wa wan na kylleiñ ki thaw leh hap ki wow lai liwan man ka sngi neidaw wa ym em thaw sah Quarter ki.
Da ong u leh wa la kamwa 8 tylli ki snem nadooh wa sdang wai yaka chnat krehkaam ha Jowai, da dep booh yei dawa wow pynyoh ya i thaw katkam i emkaam.
Ynne ka sngi da yaklam u wa u DC wa la kammon kammon, lada chah ka laad emkaam kamwa 4 Acre i thaw wow chna yaka yung krehkaam wa pura wei biang lada yoh leh wow chna ya ki yung sah Quarter.
Kamtæ ngait skem u wa i lai luti u man ko kawa mihsoh wei da kyntu u leh ya ki wakreh wow man ki kiwa yaichah chipor.
Tangwa lada jia wa ki bor District ym ye ki wow pynyoh ya i thaw, daw pyrkhat da iwi won i luti wa heiwon wa biang wa jan cha u paidbah, neibhah wa i thaw wa pura leh toh u em ki cha jan ki paidbah.
Discussion about this post